PÅ NORSK:
(Muitaleaddji: Gunvor Guttorm)
De lei Badje-Buolbmagis olmmái bivdimen sáivaguliid, dallego son lei bárdni. De vuoššai daid ja nohkihii uhca bivdogoađážii. De oaidná: De bohtet guokte čáppa nieidda goahtái; nuppis lea bealleatnon láđđegákti badjelis ja rukses láige-boagán birra; nuppis fas lea bealleatnon miesi-beaska ja nuvttá láige-boagán birra ja stuorra čáppa liidni čeabehis. De árvališgoahtiba nieidaguovttis;
- Goappá son dál munnos ovdal válddášii gálgun? dadjá dat, geas lea láđđegákti badjelis:
– Du almma dal ovdal váldá, geas leat ollu bohccot.
– Dus maiddái leat ollu sávzzat ja gusat.
– Mii bat báddegeš-šibit lea stuorra boazoealu ektui?
De riepmaba smáhkkobihtáiguin suhpodit ja mannaba ain lagabuidda. De dadjá nubbi:
– Ale mana, oarbmealli, nu lahka, de beahttátattit.
Dadjá nubbi:
– In mon nu fargga beahtáhala.
– De áiggui diet almmái geiget gieđas ja dohppet, muhto de viehkaleigga uskus ja oinniiga, ahte dat lihkkasii. De manaiga olggos.
De gullá fasttain maŋŋil, de juoigá:
– Vuoi Čoavva-sohka ii fuollan Ginttalgietti fávrruin.
De golmmageardde gearddui daid sániid: "Ii fuollan Ginttalgietti fávrruin." De árvidii maŋŋil, ahte dat ledje vissásit gufihttár-nieiddat.