Báŋkoseastin unnán gánnáhahtti
Vaikko dábálaš seastin báŋkkus ii gánnát, de goitge eatnašat Norggas dahket juste fal dan. Ovcci logi ruvnnos maid seastit, mii doalvut dábálaš seastinkontui. Finans Norge fágahoavda Rolf Mæhle lohká reanttu leat nu vuollin vel dakkár kontoin mas galggašii leat alla reanttu, ahte seastin ii oba ge šat leat gánnáhahtti. Dán jagi cuoŋománu logut čájehit ahte norgalaččain leat 1.000 miljárdda ruvnnu seastinkontoin, muhto 135 miljárdda sestojuvvojit oasusfoanddain.
