Sámi politihkkárat buot dásiin ja surggiin Davvi-Norggas berrešedje viššaleabbot searvat servvođat digáštallamiidda, de easkka livčče vejolaš oažžut vuđolut ja viidát gova sámeáššiin, lohká áviisa Finnmarken redaktevrra, Kari Karstensen. Su mielas lea šállošahtti go sámi politihkkárat nu hárve čállet lohkkiidreivviid ovdamearkka dihte daid stuoramus aviisaide norggas.
- Su mielas lea sállošahtti, go sámepolitihkkárat eai leat doarvái oidnosis almmolaš ságasdallamis Davvi-Norggas ja báikkálaččat Finnmarkkus, dadjá Karstensen.
- Galggašedje eanet oidnosis
Finnmarkku journalistasearvi dat mannan basiid lágiđii seminara Álttás dan birra, man muddui sámi vuoigatvuođa rahčamusat leat ollen 30 jagi maŋŋá Álttá Guovdageainnu eanu dulvadeami. Dan oktavuodas čujuhii Finnmarken redaktevrra Kari Karstensen, ahte alo go šaddá sáhka vuoigatvuodaid birra, de leat nu ollugat norgga servvodagas viššalat fallehit daid, geat dáhtošedje rievdadusaid sámi aššiid ektui,- oalle dávjá bohtet maid boasttu čuoččuhusat sámi aššiid birra. Áiddo fal danne livčče ge dehalaš, ahte sámi politihkkárat ge livčče eanet oidnosis almmolaš servvodat digaštallamiin, lohká Karstensen.
- Ádde moaitágiid
Sámedikki ráđđelahttu Marianne Balto ádde Karstensen moaitaga, ráđđelahttut leat dieđusge veaha erenoamas dilis, go galget ráđđadallat ráđđehusain iešgudetge áššiin, muhto ovdamearkka dihte sámediggeáirasat geat sihke opposišuvnna ja posišuvnna beles eai leat mielde sámediggeráđis, berrešedje áinnas viššaleabbot searvat digaštallamiidda lohka Balto.
- Dat leat unnán sámepolitihkkárat, geat oidnojit ja sii geat leat ráđis, sihkkárit sáhtašeimmet maid leat eanet oidnosis. Sámediggeráđđi maid dárbbasivčče bellodagain ja organisašuvnnain eanet doarjaga áššiid ovddideapmai. Muhto dat lea álo nu, ahte go galga áššiid juksat doarvái bures, de livčče ávki servvodagas, mii maid duvdá dáid ovddosguvlui, lohká Balto.
GULDAL: