Jos sámimánát eai beasa dáid nu gohčoduvvon máilmmegirjjálašvuođa klassihkáriid lohkat iežaset gillii, de lea váddásat oažžut sin geavahišgoahtit sámegiela beaivválaččat.
- Jus son galggašii oaččut iežas nieiddažiid lohkat sámegiel girjjiid, de galgaba soai beassat lohkat daid gelddoleamos ja somámus muitalusaid sámegillii, muđui háliđeaba soai daid darogillii, dadjala Pedersen.
- Vásihan dán maid ieš
Son lea ieš juo vásihan, ahte su nieddašguovttos dáhtošeigga lohkat dovddus mánáidgirjjiid, mat gávdnojit dárogillii, dan sadjái go dálá mánáidgirjjiid sámegillii muitala Helga Pedersen.
Jos sámegillii jorgalivčče ovdamearkka dihte Astrid Lindgren girjjiid, nugo Pippi Langstrømpe ja eará dovddus mánáidgirjjiid, ja nuoraide ges omd. Harry potter girjjiid, de livčče doaivva eambbosiid movttiidahttit sámegiela hállat, jáhkká Pedersen.
Beaggán mánáidgirjjiid berrešii jorgalit sámegillii, dego dán muitalusa.
Son deattuha, ahte lea vejolaš ruhtađit sihke ođđa girjjiid sámimánáide, maid sámi girječallit čállet ja seammás maid jorgalit eanet mánáidgirjjiid, mat juo gávdnojit máilmmegirjjálašvuođas. Su mielas oaččošii sámigielddain roahkkadit unniđit áššebáhpáriid jorgaleami ja baicca geavahit ruđaid mánáidgirjjiid jorgaleapmái.
- Dan sadjái, go golahit ruđaid áššebáhpiriid jorgaleapmái duon ja dán gielddastivrii, livčče dehálut sámegillii jorgalit ee. Harry Potter ja eará dovddus mánáid ja nuoraid girjjiid, lohka Pedersen.
Pedersen áigu maid siskkáldasat bargat nu, ahte ráđđehus boahttevaš ruhtajuolludemiin vuoruha eanet sámimánáidgirjjálašvuođa.
Veahkkin seailluhit giela
Samlaget girjelágadusa jođiheaddji Ragnfrid Trohaug maid imašta, manne sámegillii eai leat jorgaluvvon eanet mánáidgirjjit. Sii almmuhit girjjiid ođđadárogillii ja oidnet, ahte jorgalemiid bokte ožžot eambbosiid lohkat girjjiid ođđadarogillii.
Samlaget girjelágadusa jođiheaddji Ragnfrid Trohaug.
Foto: Mette Ballovara / NRKTrohaug lohká maid Færsulluin leat hui gozuid alde seailluhandihte iežasit giela. Doppe lohket giellabargit, ahte jos daid eanemus bivnnut mánáidgirjjiid máilmmes eai jorgal sin gillii, de mánát lohket girjjid dánska dahje eaŋgalasgillii.
Son jáhkka ahte unnitgielat nugo sámegiella sáhttet jávkat jos mánáide eai fállojuvvo máilbme buoremus mánáidgirjjit sin iezaset gillii.
- Dálá globaliserejuvvon máilmmes dihtet mánát ee. Harry Potter ja eará beaggán muitalusaid birra, ja de háliđit sii daid maid lohkat, guđe gillii dal ležžet, muitala Trohaug.
GULDAL:
