Klokka 23.45 i går kveld fekk politiet informasjon om ein mann som skal ha lagt ei 17 år gamal jente i bakken og deretter forsøkt å få av ho buksene i Åkrehamn sentrum på Karmøy.
Fredag ettermiddag har politiet framleis ingen mistenkt i saka.
Kom seg unna
Politiet rykka ut og har i natt søkt etter overfallsmannen. Ein hundepatrulje har også vore med i søket og undersøkinga av åstaden. Utan resultat.
– Overfallet skal ha blitt avbrote ved at jenta skreik og deretter klarte å springa vekk frå gjerningsmannen, skriv operasjonsleiar i Haugaland og Sunnhordland politidistrikt, Jarle Utne-Reitan, i politiloggen.
Artikkelen fortset under kartet.
Jenta, som sprang frå gjerningsmannen, støytte på ei anna jente og bad henne om hjelp. Saman ringde dei på ei dør i nabolaget. Her budde det ein mann som straks varsla politiet om hendinga.
Den fornærma jenta fortalde at ho trudde mannen anten ville drepa ho eller at han ville valdta ho.
Politiet treng tips
Fornærma er undersøkt av politi og helsepersonell, og politiet har sett ho i kontakt med valdtektsmottaket.
– Sidan fornærma framleis ikkje er ferdig avhøyrt, kan me på dette tidspunkt ikkje gå ut med ei beskriving av gjerningsmannen, men me er interesserte i tips frå publikum, skriv Utne-Reitan.
Artikkelen held fram under biletet.
Overfallet skjedde i Åkrehamn sentrum, eit stykke bak Hauges bakeri. Her skal det vera direkte sikt frå fleire leilegheitsbygg i området. Det er Karmøy lensmannskontor som leiar etterforskinga.
– I dag vil me halda fram med vitneavhøyr og avhøyr av jenta, seier operasjonsleiar i Haugaland og Sunnhordland politidistrikt Agnar Austerheim.
Rundspørjing i området
Fredag føremiddag var politietterforskarar på staden. Klokka 14.30 hadde dei framleis ingen mistenkt i saka.
– Me har gjort ein del arbeid, men er ikkje komne i mål, seier Trond Kristiansen ved Karmøy lensmannskontor.
Ifølgje han har fredagen gått med til vitneavhøyr, rundspørjing og avhøyr av jenta som blei utsett for overfallet.
– Etterforskinga held fram måndag. Me har ingen konkret mistenkt, seier Kristiansen.