Omsyn til villrein kan flytta turisthytter

– Me vil veldig gjerne ha nokre av dyra ut i utkantane av verneområdet. Det er for at villreinen skal ha fleire stader å gå for å finna mat, dersom snøen frys til i dei sentrale områda, seier forvaltar Tarjei Haugen.

• Les også: Ber turister ta hensyn til villreinen

Ønskjer å auke stammen

Spesielt sør for Blåsjø i Ryfylkeheiane er det lite villrein for tida. Tidlegare trekte villreinflokkar inn i både Hjelmeland og Frafjordheiane.

Nå vil vernestyresmaktene finne ut kva som hindrar reinen i å gjere det same i dag. Derfor har dei radiomerka fleire dyr, og kan følgje trekka deira steg for steg, for å sjå kva reinen opplever som hindringar.

• Les også: Skal merke flere reinsdyr med GPS

Spelar på lag

Sør og søraust for Blåsjø i Ryfylkeheiane ligg to av hyttene til Stavanger Turistforening. Det er ennå for tidleg å seie om turistane som går mellom hyttene hindrar at villreinen kjem lengre vest og sørover.

– Men dersom vernestyresmaktene kjem fram til at det har noko å bety, så er Stavanger turistforening viljug til å gå inn i ein diskusjon om å fjerne eller å endre plasseringa av desse hyttene, seier styreleiar i turistforeninga, Per Hanasand.

Han legg likevel til at han ikkje trur at aktiviteten til fotturistane har noko avgjerande å seie for kor villreinen går.

To hytter

Det er hyttene Storsteinen og Hovatn, som ligg sør og søraust for Blåsjø, som kan få ny plassering.

Dette blir i tilfelle klart etter 2018, då vernestyresmaktene er ferdige med forskinga på rutene dei radiomerka villreinane brukar.

• Les også: Villreinens private fotoalbum

– Me må sjå om vinterløypa delvis kan gå over Blåsjø, og at me eventuelt lagar ei ny løype på vestsida av Blåsjø. Der blir det i tilfelle snakk om å setja opp ei eller to nye hytter, seier Per Hanasand, styreleiar i Stavanger Turistforening.