Måndag føremiddag la rådmann Inger Østensjø og økonomidirektør Kristine Hernes fram statusen for den hardt pressa økonomien i Stavanger då dei la fram tertialrapporten per. 30.04.2015.
På møtet, der både media og politikarar var til stades, la rådmannen fram sin plan for korleis kommunen skal klara å spara 69 millionar kroner i budsjettåret 2015.
– Hastar å gjera noko
Spareplanen kjem på toppen av alt vedtatte innsparingar på 170 millionar kroner i desember i fjor.
– Inntektene sviktar såpass dramatisk at det hastar å gjera noko, men eg meiner me har eit veldig godt grunnlag for å få dette til, sa rådmann Inger Østensjø då ho inneleia møtet i formannskapssalen.
– Skatteinntektene sviktar utover det som blei lagt til grunn tidlegare, og skattesvikten i Stavanger skjer raskare enn i resten av landet. Arbeidsløysa aukar og er nå på nivå med resten av landet, held rådmannen fram.
Her er rådmannen sine forslag til kutt:
- Barnehage: 12,2 millionar
- Skule: 16,5 millionar
- Levekår: 17,8 millionar
- Barn og unge: 1,8 millionar.
- Bymiljø og utvikling: 14,9 millionar kroner
- Økonomi og personal og organisasjon: 5,4 millionar
- Samfunnsmedisin: 1,1 millionar kroner
- Stavanger eiendom: 3,9 millionar kroner.
- Park og vei: 6,4 millionar kroner
- Idrett: 4,6 millionar.
- Kultur og byutvikling: 2,3 millionar kroner.
Rammar alle område
Inger Østensjø seier Stavanger kommune i lengre tid har vore førebudde på dei nye kutta på nesten 70 millionar kroner.
– Kutta rammar alle område; skular, barnehagar, pleie- og omsorg og kultur- og idrett.
– Må folk rekna med nye kuttrundar?
– Det er veldig vanskeleg å spå om framtida. Det viktigaste for oss er å følgja godt med og vera så i forkant som mogleg når det gjeld prognosane på inntektene, seier rådmann Østensjø.
– Blir heilt sikkert endringar
11. juni skal tertialrapporteringa behandlast i formannskapet. Der må politikarane ta stilling til kuttforslaga.
– Dette er rådmannen sitt forslag og endringar blir det heilt sikkert. Nå skal me gå gjennom forslaget punkt for punkt og sjå kva som er viktig å ikkje kutta på, seier ordførar Christine Sagen Helgø (H).
Ho seier fleirtalspartia i Stavanger spesielt er opptatt av å skjerma tilboda til barn og unge.
– Me må gå nøye gjennom kuttforslaga som gjeld barnehagar og skular. Samstundes veit me at inntektene er lågare enn før. Då må me setja tæring etter næring.
For opposisjonspartiet Arbeidarpartiet blir det viktigast å skjerma dei svakaste gruppene i samfunnet.
– Derfor har me sagt at me prioriterer barnehagar og skular og omsorgs- og helsesektoren. Der vil me først og fremst sjå på skjerming, seier Cecilie Bjelland (Ap).