Vinteren har så langt vore uvanleg snørik i fjella på Vestlandet. Denne veka sjekkar turistforeininga tilstanden til turisthyttene i Sirdal, Setesdal og Ryfylkeheiene saman med lokalkjende, for å sikra at dei er klare for innrykket av skigåarar i vinterferien.
Men ved Sandvatn er halve hytta dekka av snø.
– Det er ei inngangsdør på andre sida, men den er heilt nedsnødd. Du ser den ikkje, seier Østenbø, som kvar vinter i 20 år har hatt oppsyn med turisthyttene i området.
I Stranddalen er det så mykje snø at Turistforeininga ikkje klarar å opna hytta til vinterferien.
– Det er ei hytta der det normalt plar å vera mykje snø, men når det nærmar seg påske kan eg garantera at me skal grava den fram, seier Per Henriksen, driftsleiar i Stavanger turistforeining.
Han tok turen i eit småfly over fjellområda på ein dag ein nesten kan kalla den perfekte vinterdag: minusgrader, lite vind, mykje snø, sol og blå himmel.
– Det ser jo veldig bra ut. Det vil vera heilt perfekt å gå her framover, seier Henriksen.
Men skal du ut på tur, bør du gjera det før helga! Då kan det nemleg bli uvêr i store delar av Noreg.