Mange prestar nærmar seg pensjonsalder

Det er venta travle tider i Stavanger Bispedøme. Snart vil dei trenga mange nye prestar.

– Me vil få behov for å tilsetja nye prestar om fem til ti år, då er det mange prestar her som går av med pensjon, seier personalrådgjevar i Stavanger bispedøme Harald Svendsen.

• Les òg: Mangel på prester i Møre Bispedømme
• Les òg: Frykter presteyrket blir kvinnedominert

– Viktig at presten ikkje blir oppfatta som ein gamal mann

Ein tredel av dei om lag 100 prestane i Stavanger bispedømme er 60 år eller meir. Det same gjeld i Møre og Nord-Hålogaland-bispedømme.

Landssnittet er litt lågare. Der er kvar fjerde prest i klassen 60 pluss.

Dette kan få konsekvensar for tilhøvet mellom yngre menneske i kyrkjelyden og presten, seier leiar i Presteforeninga i Norge, Gunnar Mindestrømmen.

– Det å vera prest handlar mykje om å jobba i relasjonar til menneske, seier han.

Han meiner derfor det er viktig at det finst prestar som kjenner til dei same problemstillingane, som til dømes ein småbarnsfamilie.

– Det er viktig at presten ikkje berre blir oppfatta som ein gamal mann, seier han.

Trivst i jobben

Men i Stavanger bispedømme er det tydeleg at prestane trivst i jobben.

Gjennomsnittleg pensjonsalder er mellom 66 og 67 år.

Det betyr at mange held ut til dei er 70 år før dei sluttar av.

– Dette er i alle fall eit teikn på at prestane ønskjer å arbeida her. Men dei opplever også at dei er etterspurde frå kyrkjelyden. Mange vil at presten deira skal halda fram til 70-årsalderen, seier Harald Svendsen.

– Ikkje bra for rekrutteringa

– For meg er det lettare å jobba med ungdomsarbeid, eller med studentar, sidan eg er i same livssituasjon sjølv, seier 20 år gamle Tage Emil Good Djøseland, som nett har avslutta første året på teologistudiet på Misjonshøgskulen i Stavanger.

Han meiner at det kan vera utfordrande å nå fram til yngre folk med ein prestestand der kvar tredje prest er over seksti.

– Dette er ikkje bra for rekrutteringa, så noko bør skje her. Det trengst yngre prestar for å halda liv i kyrkjene rundt omkring, og for at dei skal nå alle folkegrupper.

Har tru på nye tiltak

Sjølv fekk han sterke reaksjonar på utdanningsvalet hans.

– Mange blei veldig overraska, men kyrkjelyden min blei veldig glad for karrierevalet mitt.

Han trur at terskelen for å velja presteyrket hos unge kan vera høg.

– Mange tenker kanskje at ein må ha eit tidleg og sterkt kall for å gå inn i denne retninga. Og frå andre sida kan i alle fall ikkje utdanninga freista med god løn, seier han.

Han ser likevel ikkje svært mørkt på situasjonen.

– På misjonshøgskulen blir det snakka mykje om måtar me kan få inn fleire teologistudentar. Eg trur det vil koma ein del spanande tiltak ut av dette.

– Kva type tiltak?

– Mellom anna reisa rundt i kyrkjelydar og opplysa unge om yrkesvalet. Og formidla at det ikkje nødvendigvis treng å vera snakk om eit sterkt kall. Ofte blir vegen til mendan ein går, seier han.

Han meiner ein god prest ser alle i kyrkjelyden og klarar å stimulera til misjon.