Klokka hadde passert midnatt, då dei to mennene i 30-åra gjekk langs vegen og blei påkøyrd av ein latvisk statsborgar på 24 år i ein personbil. Ulukka skjedde på fylkesveg 611 i Audbøsundet på Bjergøy.
Bjergøy er ei av Sjernarøyane og høyrer til i Finnøy kommune i Rogaland.
Truleg køyring i rusa tilstand
Den 24 år gamle bilføraren frå Latvia, sit i arresten og ventar på å bli avhøyrt.
Mannen er sikta for aktlaust drap.
Det er tatt blodprøve av han, som skal analyserast, men det er sterk mistanke om at han har køyrt i rusa tilstand. Det seier operasjonsleiar ved Rogaland Politidistrikt, Victor Jensen.
Søndag morgon og føremiddag undersøkjer politiet staden der ulukka skjedde, i tillegg til å avhøyre vitne.
– Det var totalt tre passasjerar i bilen, og politiet vil avhøyre dei i tillegg til meldaren av ulukka, seier politiet.
Er frå Stavanger
Dei næraste pårørande er varsla og politiet kan stadfesta at dei to omkomne er frå Stavanger. Dei skal vera i 30-åra.
– Dei næraste pårørande er alt varsla, opplyser operasjonsleiar Jensen.
Laurdag var det Fiskefestival på Bjergøy, så det var ekstra mykje folk på øya.