Det 750 år gamle klosteret på Mosterøy har eigen hotell og restaurantdel, men den blei for tung for museet å drifta. I vår var det mest aktuelt å legge det ned.
- LES OGSÅ:
Men no har redninga kome, restaurantkongen Arne Joachimsen vil ta over drifta.
Redda av restaurantkongen
– Dette er ein veldig viktig dag for oss. Det at me klarer å få til ein samarbeidsavtale som gjer at me framleis kan gi publikum eit godt tilbod både innanfor servering, overnatting og konferansar, seier Aavitsland.
Nå skal Museum Stavanger ta seg av det dei kan, nemleg å drive klosteret, medan profesjonelle i faget skal drive hotell- og serveringsdelen på klosteret.
Aavitsland er glad for at dei kan ha eit breitt tilbod på Utstein.
– Det er jo ein spesiell stad sidan dette er det einaste ståande mellomalderklosteret i Norge. Det er eit nasjonalt kulturminne, seier Aavitsland.
Mellomaldermat
– Eg er oppteken av at dette området er veldig unikt, at det ikkje berre er klosteret men også området rundt som er veldig spanande, seier styreleiar i restaurantane Herliga Stavanger, Arne Joachimsen.
Maten som han vil servere skal vera inspirert av munkane sitt kosthald i mellomalderen.
– I tillegg vil me også prøve å bruke mest mogleg lokal mat forankra her på Klosterøy, Mosterøy og Rennesøy generelt. Mellom anna så har me eit samarbeid med Klostergarden, og då tenkjer eg på dielam, pattegris eller skogsgris som dei har byrja med, seier Joachimsen.
Kan få besøk av gjenferd
Og det skal også vera ein viss spenning ved å krype til sengs i det 750 år gamle klosteret.
– Det er jo ei kvit dame som kanskje går igjen her, så det gjer det jo svært spanande å overnatte.