– Me har akkurat fått melding om at me er tildelt 200 000 kroner til forprosjektet "Liv på Nes".
Dette fortel ein glad leiar for arbeidsgruppa på Nesflaten i Øvre Suldal, Åshild Vetrhus.
Pengane kjem frå det statlege organet Kunst i offentleg rom, KORO. Tidlegare i haust fekk dei også 100 000 kroner i prosjektstøtte frå Rogaland fylke.
Liv på Nes
Prosjektet har fått namnet "Views" og har som mål å skape spanande uterom på Nesflaten. Dette skal igjen styrke bygda sin identitet og bidra til at fleire turistar stansar opp og brukar tid og pengar i området.
Les også:
Hjelp frå Danmark
Den danske kunstnaren Jeppe Hein har teikna ein trekonstruksjon, som ser ut som eit fjellmassiv og som skal plasserast på taket av sentrumsbygget på Nesflaten.
– Det nye taket skal bli som eit fjell. Det skal vere råd å setje seg ned på taket og ta seg ein kopp kaffi og sjå bort på dei andre fjella i området, seier Vetrhus.
Hein har også teikna ei fontene som skal plasserast på kaien nede ved Suldalsvatnet.
Ting tar tid
Nesflaten er ei lita bygd med 240 innbyggjarar og som er utsett for fråflytting.
Det var i november 2014 at den lokale arbeidsgruppa presenterte planane sine for korleis dei skal få friska opp sentrum, og skapa optimisme for bygda.
Arbeidsgruppa hadde då alt to års arbeid bak seg. Nå har det gått nok eitt år, og nå byrjar pengane til eit forprosjekt å koma på plass.
– I tillegg har me også søkt Suldal kommune om pengar, fortel Vethrus. Kva som kjem ut av den søknaden blir klart når budsjettet for kommunen blir lagt fram om kort tid.
Del av arkitektrundtur
Kommunane Sauda og Suldal i Indre Ryfylke arbeider for å etablere ein arkitektur-rundtur.
– Det me satsar på er at dette prosjektet vil inngå der, saman med Geir Grung sitt Hydro-anlegg i Nesflaten, og Peter Zumptor sitt nye "gruvebygg" i Allmannajuvet, seier leiar i arbeidsgruppa Liv på Nes, Åshild Vetrhus.