– Det var veldig tydeleg at taktikken var å bremse farten og hindre oss i å kome forbi, seier Anders Fiskvik.
Han vart nummer tre i årets Nordsjøritt, og meiner at sykkellaget Coop Østerhus øydela vinnarsjansane hans.
– Sperra vegen
– Coop Østerhus kom seg raskt inn på den smale kystvegen. Dei sende ein mann foran, og tre andre låg bak han og sperra vegen. Me prøvde å rope til dei at me ville forbi, men dei foran var mest opptekne av å stenge vegen og halde farten nede, seier Fiskvik.
Det var Fredrik Galta frå nettopp Coop Østerhus som til slutt vann eliteklassen for menn.
- LES OGSÅ:
– Dersom dette blir strategien i terrengsykling så er jo heile sporten eigentleg litt falitt, seier Fiskvik.
– Køyrde ikkje usportsleg
– Eg er ikkje samd i at me køyrde usportsleg. Eg har snakka med ryttarane på laget. Og dei opplevde ikkje at dei gjorde noko som dei ikkje kunne stå inne for, seier sportsdirektør i Coop Østerhus, Roy Hegreberg.
Han meiner dei berre har brukt ein heilt vanleg taktikk.
– Det er eit veldig trangt parti i starten og me tek kontroll og sender fram folk. Dette er jo noko som er veldig vanleg å bruke i landevegsløp. Ein les terrenget på kritiske punkter, seier Hegreberg.
Det er ikkje Fiskvik samd i.
– Eg har aldri opplevd dette nokon annnan stad. Eg meiner at det blir heilt feil å ligge å blokkere, seier han.
Vil vurdera ein ny taktikk
Uansett meiner Hegreberg at episoden tidleg i løpet hadde lite å seia for sluttresultatet.
– Dette var ikkje måten me vann løpet på. Dette var i ein tidleg fase, og det var ikkje den ryttaren som låg framme som vann ein gong, seier Hegreberg.
- LES OGSÅ:
Coop Østerhus har vunne eliteklassen for menn i Nordsjørittet fleire år. Men kritikken som har kome i år, gjer at dei vurderer å gjera ting litt annleis neste år.
– Me får legge opp til ein litt annan taktikk neste år, avsluttar Hegreberg.