– Det er ein ekstraordinær situasjon som me meiner at eit rikt land som Norge har eit stort ansvar for å bidra i. Difor er me glade for at landsmøtet var så tydeleg på at dette er ei veldig viktig sak for partiet, seier nasjonal talsperson i Miljøpartiet Dei Grøne, Hilde Opoku.
Ingen røysta imot, då landsmøtet i dag vedtok ein hasteresolusjon om at Norge må ta imot 5000 kvoteflyktningar frå Syria i 2015 og 5000 i 2016.
I går vedtok også landsmøtet til KrF å ta imot 10 000 flyktningar over to år.
Tolv flyktningar per kommune
Finansieringa meiner MDG skal kome frå tillegget som Regjeringa har varsla at kommunane skal få i revidert budsjett.
– Me meiner at når Regjeringa har annonsert at dei vil overføre meir til kommunane i revidert budsjett, så er situasjonen så prekær at me meiner at det er pengar som må brukast på busetting av flyktningar i kommunane. Det blir om lag 12 flyktningar i snitt per kommune og det meiner me at Norge har råd til, seier Opoku.
Men dette er vel pengar som kommunane treng til andre ting?
– Det er heilt klart at kommunane har andre oppgåver som også er viktige. Men det er snakk om prioriteringar, og dette handlar om å redde liv. Og me meiner at me må ta dette løftet i Norge, seier Opoku.
Ein milliard meir til naudhjelp
Men partiet vil ikkje berre hente flyktningar til Norge. I den same resolusjonen vedtok partiet at Norge også må auke naudhjelpa til nærområda rundt Syria med ein milliard, i revidert budsjett. Då vil den samla naudhjelpa frå Norge i 2015 bli på om lag 1,5 millarder kroner.