Leiteaksjonen går føre seg utanfor Hellvik i Moivika. Fiskaren gjekk ut i ein 26-fots båt klokka 10-tida i dag for å trekka hummarteiner. Han har framleis ikkje kome tilbake, og det er familien som har meldt han sakna.
Helikopteret blei sendt ut klokka 17.45. Redningsfartøyet Peter HV Koss er også i området og leiter.
– Det er mørkt, og det blæs frisk bris, men elles blir det rapportert om greie søkeforhold, seier redningsleiar i Hovudredningssentralen Sør-Norge (HRS), Cecilie Øversveen.
I tillegg blir alle båtar som trafikkerer i området kalla opp og bedne om å vera på utkikk og søka med hjelp av radar.
Klokka 19.30 var fiskaren framleis sakna ifølgje HRS.
– Me søker hovudsakleg der det var planlagt at båten skulle gå, men det er ei kontinuerleg vurdering på om me utvidar søket til eit større område, seier redningsleiar i HRS, Per Fjell klokka 19.30.
Klokka 20 opplyser Fjell at dei har utvida søket til område båten kan ha drifta. Med søraustleg vind vil dette sei at dei leiter nordover i eit område på om lag 45 gonger 25 kilometer.
Vinden har auka på til liten kuling.