Legg asfalt i staden for å brøyta

Vinteren i fjor var så kald at fleire kommunar gjekk lens for vegsalt til å strø på dei glatte vegane.

Det er ikkje eit problem i år. På saltlagaret til Sandnes bydrift hadde dei handla inn ekstra mykje salt for å vera best mogleg førebudde på vinteren. Men mildvêret gjer at det meste framleis ligg ubrukt.

• Les òg: Slik blir årets vintervegar

Har til salt i grauten

At Sandnes og dei andre kommunane nå har til salt i grauten, ser ikkje driftssjefen for Sandnes bydrift, Sveinung Sviland på som eit problem:

– Saltet kan ligga til neste år, så det er ikkje krise om me brenn inne med det, seier Sviland han.

I staden for å salta å måka, kan vegarbeidarane nå heller asfaltera øydelagde vegar:

– Det er jo ein trist vinter, men arbeidsmessig får me heller gjort arbeid som viser att, og som me har nytte av framover. Det er jo betre enn at me berre måker på snø som uansett ville ha smelta av seg sjølv, seier han.

– Sjeldan kost å asfaltera i januar

– Det har vore veldig kalde vintrar nå, der frost har øydelagt mykje av vegane, seier Terje Bøe, vegarbeidar i Sandnes kommune.

Dermed kan dei altså bruka januar til å fiksa opp:

– Det er ikkje vanleg me legg asfalt nå, normalt køyrer me salt, seier Bøe.

Han er personleg ikkje plaga av at plogen får stå i fred:

– Nei, snøen kan vera i heia, seier han med eit smil.