Kritisk til endringar i båtførarprøven

«Hvor lenge varer et seks kilo pulverapparat/håndslukkerapparat med jevn og full utblåsning. Er det 5 sekunder, 15 sekunder, 115 sekunder eller er det 215 sekunder?»

Egil Nylund les opp eitt av spørsmåla frå den nye båtførarprøven, som trådde i kraft frå 2. mars i år.

Den tidlegare direktøren for Det Stavangerske Dampskibsselskab (DSD) og båtkurshaldar i Stavanger gjennom 20 år, er svært kritisk til fleire av dei 250 nye spørsmåla i prøven.

– Eg har snakka med erfarne brannfolk som ikkje klarer å svara på spørsmålet om pulverapparatet. Me må ikkje gløyma at det er 14-åringar som får lov til å gå opp til prøven, seier Nylund.

• LES OGSÅ: Vil ha praktisk del på båtførerprøven
• LES OGSÅ: Krever lik fartsgrense til sjøs

Strykprosenten har gått kraftig opp

På kursa hans har strykprosenten gått kraftig opp sidan Sjøfartsdirektoratet kom med nytt pensum og 250 nye spørsmål til båtførarprøven i mars. Og det finst også andre yrkesgrupper som reagerer på fleire av spørsmåla, ifølge kurshaldaren.

– Enkelte spørsmål er såpass vanskeleg formulert at til og med helsepersonell seier at dette kan ikkje ein 14-åring svara på. Erfarne sjøfolk stiller seg også undrande til fleire av spørsmåla.

Norsk Maritim Kveldsskole driv kurs for folk som skal ta båtførarprøven over heile landet. Hos dei har strykprosenten etter endringane i mars gått opp med 10–20 prosent.

– Nokre av våre instruktørar reagerer kraftig på spørsmål som har lite med båtkøyring å gjera, seier dagleg leiar Frank de Flon.

Også Engelsviken Båtskole i Fredrikstad opplever ein merkbar auke i strykprosenten, spesielt blant unge.

• LES OGSÅ: Redningsselskapet: – Båtfolket etterkommer vestpåbudet
• LES OGSÅ: Lovar hyppigare promillekontrollar til sjøs

Avviser kritikken

Sjøfartsdirektoratet er ansvarlege for innhaldet i båtførarprøven. Overingeniør Heidi Therese Bless avviser at spørsmåla har blitt vanskelegare og at strykprosenten har gått opp etter 2. mars.

– Våre tal viser at prøven har blitt enklare, ikkje vanskelegare. Strykprosenten har vore stabilt på 20 prosent, både før og etter den nye prøven, seier Bless.

Ho legg til at Sjøfartsdirektoratet likevel har fått tilbakemeldingar frå ein del kurshaldarar som opplever prøven som vanskelegare, og at prøven blir endra heile tida.

– Dersom me får tilbakemelding om at eit spørsmål er feil, blir det sjekka opp og retta umiddelbart.

Kurshaldar Egil Nylund i Stavanger har nå tru på at fleire spørsmål blir retta opp.

– Eg har jobba mot Sjøfartsdirektoratet i mange år og har inntrykk av at dei lyttar og er positive. Eg er overbevist om at dei rettar opp det som er urimeleg.

PS: Rett svar på spørsmålet om pulverapparatet er 15 sekund.