– Rødne er med på alt som har med å transportera folk og bilar på sjøen, så dette er interessant for oss å sjå på, seier dagleg leiar i reiarlaget Rødne, Lars Rødne.
Forsand kommune har i fleire år jobba for at private aktørar skal få lov til å driva ferjesamband over Høgsfjorden når Ryfast opnar i 2019, og i går kom svaret Forsand-ordførar Ole Tom Guse har venta på: Staten gir grønt lys for privat ferjedrift mellom Lauvvik og Oanes i Høgsfjordsambandet.
Ikkje offentleg støtte
Dersom private skal driva ferjesambandet etter Ryfast-opninga, skjer det utan offentleg støtte. Det treng ikkje gjera drifta ulønnsam, ifølge Rødne.
– Dette kan vera lønnsamt utan offentlege tilskot, men eg må undersøka reisegrunnlaget og vilkåra nærare før eg kan svara heilt klart på dette.
Rødne har ikkje per dags dato ferjer tilgjengelege for sambandet. Reiarlaget kjøpte tidlegare den gamle Høgsfjord-ferja («Rygerfjell»), men ifølge Lars Rødne er ikkje dette ei optimal ferje for sambandet i dag.
Varslar nye samtalar
Regionsjef for Norled sine ferjer i Rogaland, Gaute Gangenes.
Foto: NRKForsand-ordførar Ole Tom Guse har tidlegare hatt dialog med Tide Sjø (nå Norled, jour.merk.) om privat ferjedrift over Høgsfjorden.
Regionsjef for Norled sine ferjer i Rogaland, Gaute Gangenes, seier det er interessant med privat ferjedrift, men vil undersøka saka før han seier noko meir.
– Me har hatt samtalar med kommunen før, men eg må kontakta ordføraren og sjå nærmare på dette før eg uttalar meg skikkeleg om saka nå.
Fryktar ikkje Ryfast-konkurransen
Ifølge Gangenes er det nesten like mange bilar som blir frakta med Høgsfjordsambandet som i Tau-sambandet. Men talet på passasjerar er større på Tau-ferjene på grunn av alle pendlarane.
– Lauvvik–Oanes er eit effektivt og godt samband. Men det er ikkje berekraftig i seg sjølv slik drifta er i dag, ein stor del av pengane kjem frå det offentlege, seier Gangenes.
Lars Rødne fryktar ikkje konkurransen frå Ryfast og det som blir ein firefelts motorveg til Strandalandet.
– Det er heilt klart mogleg å konkurrera med Ryfast. Det er folk som vil ha ein fordel av å kunne køyra vegen om Høgsfjordsambandet også i framtida, seier han.
