Elevar er i full gang med å fiksa på flymotorar på Sola Vidaregåande skule. Ein av fire skular i landet som tilbyr opplæring i flyfag.
Ungdommane er med godt mot, sjølv om det nyleg blei kjent at den store flyvmotorverkstaden Pratt & Whitney truleg forsvinn frå Stavanger lufthamn, Sola.
Ei nedlegging som kan føra til at 195 tilsette mistar jobbane sine, og at det er færre arbeidsplassar for elevane å velja mellom.
- Les òg:
- Les òg:
Stort helikoptermiljø
Leiar ved flyfaglinja, Kjell Eivind Forsmo, meiner likevel at etterspurnaden er stor nok.
–Det er beklageleg at Pratt & Whitney kanskje legg ned. Men for oss er ikkje dette dramatisk, seier Forsmo til NRK.no.
Han peiker på helikoptermiljøet, som ei av årsakene til dette.
– Me har eit stort helikoptermiljø på Sola, eit miljø som også har ekspandert den siste tida. Så me skal vera godt sikra med lærlingplassar i CHC helikopterservice, i tillegg til at Norwegian også tar inn lærlingar her på Sola, seier han.
Om det skulle bli for hard kamp om arbeidsplassar etter enda utdanning, vil heller ikkje elevane vera rådville av den grunn. Dei veit at utdanninga dei tar har overføringsverdi til andre yrke.
Sjå video:
Heile Europa som arbeidsplass
– Då må eg prøva å få ein jobb som mekanikar i oljeindustrien, eller byrja som bilmekanikar, seier Erik Byrkjedal Campell, som er elev ved flyfaglinja.
På linja blir det tatt opp elevar frå heile landet, og skulen følgjer internasjonale normer. Dette gjer at heile Europa kan bli arbeidsplass for dei som ønskjer å flytta på seg.
Nok ein grunn til at Forsmo ikkje ser på ei mogleg nedlegging av Pratt & Whitney med stor skrekk.
– Solamiljøet er ikkje avgjerande for yrkesvalet, med papira dei får når dei kjem ut her kan brukas til å søkja jobb i utlandet, seier Forsmo.