På makrellgarnet fekk Bjørn Ingvaldsen ein torsk på 12 kilo. Han var først glad for fangsten, men stussa over forma på buken til fisken.
– Eg trudde kanskje det var rogn, seier Ingvaldsen til NRK.
Han skar opp fisken og fekk ei stor overrasking. I magesekken låg det ei stor brusflaske som torsken har ete.
– Det var eit skrekkeleg syn. Det gjorder rett og slett vondt inni meg.
I håp om at folk tar meir vare på naturen la han ut ein Facebook-post som har fått mange reaksjonar.
– Det går meir inn på folk når det er så nært. Eg håpar folk skjerpar seg når dei ser konsekvensane det får.
Flaska vart fjerna og fisken reinsa før den vart middagsmat. Men Ingvaldsen fekk seg nok ei overrasking då han smakte på torsken.
– Den smakte forferdeleg og det var tydleg den ikkje hadde fått i seg rett næring.
– Dramatisk
Per Erik Schulze er marinbiolog og miljøforkjempar. Han har vist eit stort engasjement for strandrydding, og har arbeida med marin forsøpling i ei årrekke.
– Plast er ei miljøgift, og me må finna og stoppe utsleppskjeldene, seier han.
Ifølge tal frå FNs miljøprogram hamnar 8 millionar tonn med plast i havet årleg. 80 % av dette stammer frå aktivitet og industri på land. I 2050 ventar forskarar å finna meir plast enn fisk i havet, viser ein rapport frå stiftelsen Verdens økonomiske forum.
Ein annan som kjenner til plast i havet er Rudolf Svendsen, som er dykkar i Norges Naturvernforbund. Han har dykka sidan 80-talet og fortel at sjøen er forandra.
– Det har eksplodert. Du kan dykke kor som helst og så finn du plastikk, seier Rudolf Svendsen.
Han fortviler.
– Plast er eit kjempeproblem, og det forsvinn aldri, seier han.
LES OGSÅ: