Det var klokka 17.34 i ettermiddag brannvesenet melde om full overtenning i ein leilegheit på Jørpeland.
– Det er ein eksplosjonsarta brann, opplyser Svein Nesse i Brannvesenet Sør-Rogaland.
Leilegheita ligg på Barka, like ved Jørpeland sentrum i Strand kommune.
To omkomne
Onsdag kveld melder politiet at to personar er funne omkomne.
– Det er fem leilegheiter på adressa og totalt bur det ni personar i leilegheitene. Dei andre er det gjort greie for, opplyser operasjonsleiar Geir Gjesdal i Rogaland politidistrikt.
Brannen er sløkt og huset er gjennomsøkt, opplyser politiet.
– Dei to omkomne er ikkje identifisert, og dei pårørande blir truleg ikkje varsla i kveld, opplyser Gjesdal i politiet.
Får hjelp av kriseteam
Strand kommune har nå kalla inn kriseteam til følgja opp dei involverte og pårørande.
– Dette er frykteleg trist. Nå tenker eg først og fremst på dei som har omkome og dei pårørande, seier Helge Steinsvåg, ordførar i Strand kommune.
Kriminalteknikarar har i kveld jobba på staden for å prøva å finna brannårsaka utan resultat.
Dei held fram arbeidet i morgon når det blir lyst.