For første gong på 10 år er alle medlemmane i Backstreet Boys samla på scena igjen. Og denne gongen skal dei til Norge, med konsert i Stavanger 8. mars. Altså kvinnedagen.
– Det passar fint med ein boyband-konsert då, seier Tore Christiansen, som leier ut Oilershallen til arrangementet.
Backstreet Boys hadde si stordomstid på slutten av 90-talet med mellom anna den store hiten «Get Down (You're the One for Me)». Dei feirar 20-års jubileum i år.
Arrangørane av konserten satsar på godt oppmøte, og minner om at boybandet er tidenes mestseljande med over 100 millionar selde album.
– Dette blir ein «Feelgood-kveld» i ein arena som verkeleg har vist seg å kunne husa store magiske augneblink, også på konsertfronten, seier Øivind Ekeland i Atomic, som er konsertarrangør.
Det blir også konsert i Trondheim Spektrum den 10. mars, i tillegg til Oslo Spektrum den 9. mars.
