Klokka halv fem i går ettermiddag fekk politiet tips om ein person i Haugesund som køyrde bil etter å ha drukke alkohol.
Politiet rykka ut, men bilføraren fekk køyrd om bord på Utsira-ferja før dei fekk fatt i han.
Før politireforma der 27 politidistrikt blei til 12 i år, så hadde dette vore enden på visa. Men etter Haugaland og Sunnhordland politidistrikt gjekk saman med Rogaland politidistrikt har dei nå tilgang til politibåten i Stavanger.
– Det var nokon kloke hovud her inne som kom på at me kunne bruka båten til å koma oss ut til Utsira, seier Håkon Tornes som er operasjonsleiar i Sør-Vest politidistrikt avdeling Haugesund.
Nå kan også politiet på Haugalandet nyta godt av politibåten som ligg ved kai i Stavanger.
Foto: Eirik Gjesdal / NRK– Normalt ville det vore eit problem for oss
Politibåten kom frå Stavanger til Karmøy og plukka opp polititenestemenn der. Vidare reiste dei ut til Utsira.
Der blei nok bilføraren noko overraska over å få besøk av politiet.
– Normalt så er det eit problem for oss å koma oss ut til Utsira utanom ferjetidene, me har då måtta tilkalla kystvakta og slike ting, seier Tornes.
Bilføraren blei teken med inn til Karmøy for blodprøve. Han er mistenkt for å køyra bil med alkoholrus.
Meir enn fem timar
Operasjonen tok meir enn fem timar, men det var ikkje for å statuera eit eksempel, slår politiet fast.
– Me ville berre oppklara saka. Folk kan ikkje forventa å koma unna med promillekøyring sjølv om dei bur litt grisgrendt til. Men for ettertida er det nok greitt at dei som bur på Utsira veit at det ikkje er fritt fram, seier Tornes.
