– Det er gledeleg å sjå at talet arbeidslause har gått ned den siste månaden, men samanlikna med mai i fjor har arbeidsløysa auka med 49 prosent i Rogaland, seier Truls Nordahl, direktør i NAV Rogaland, i ei pressemelding.
– Signal me får gjer at me framleis trur på auke i arbeidsløysa. Mange er utan arbeid i fylket vårt, og vår jobb er å møte dei på ein måte som gjer at dei kjem tilbake i arbeid, held Nordahl fram.
- LES OGSÅ:
- LES OGSÅ:
Aukar i alle yrkesgrupper
Ved utgangen av mai står 7635 personar i Rogaland heilt utan arbeid. Det er 375 færre enn førre månad. Arbeidsløysa i Rogaland er no 3,0 prosent, mot 2,7 prosent på landsbasis.
Ei kartlegging NAV Rogaland har gjort tydar ikkje på omfattande bruk av sluttpakkar i næringslivet i Rogaland.
Samanlikna med mai i fjor aukar arbeidsløysa i alle yrkesgrupper, med unntak av jordbruk, skogbruk og fiske. Det er flest arbeidslause innan bygg- og anlegg, industriarbeid og innan ingeniør- og ikt-fag.
Nedgangen i arbeidsløysa den siste månaden viser igjen i fleire yrkesgrupper, men størst reduksjon har bygg- og anlegg og industriarbeid. Arbeidsløysa blant ingeniørar held seg stabil.
– Ein annan årsak til at nedgangen me ser den siste månaden, er at fleire får tiltak i regi av NAV. Den siste månaden er om lag 100 fleire arbeidslause personar i ulike tiltak i fylket. Ser me på tiltak for arbeidssøkjarar får 907 personar tiltak frå NAV i Rogaland i mai, seier Nordahl.
- LES OGSÅ:
Eigne jobbklubbar
Eit av tiltaka NAV Rogaland jobbar for at fleire kan delta på er jobbklubbar, der kartlegging av eigen kompetanse, cv, søknad og intervju er sentrale tema.
For å dekkje ulike behov er det eigne jobbklubbar for unge under 25 år, for arbeidssøkjarar med høg utdanning, for arbeidssøkjarar generelt og for arbeidssøkjarar frå EØS-land, der delar av møta går føre seg på engelsk.
Det er framleis mange utlyste stillingar i fylket, men det er eit misforhold mellom bakgrunn arbeidssøkjarar har og kompetansen arbeidsmarknaden etterspør. Mange må nok sjå etter arbeid i andre bransjar enn dei er vant til.
– Me legg no til rette for at personar med teknisk bakgrunn frå olje- og gassektoren kan bli kvalifisert til jobbar i bygg og anleggsbransjen. Gjennom kurs kan fleire kvalifisere seg for gravearbeid og anna anleggsarbeid, for å møte behovet for arbeidskraft i forbindelse med større vegprosjekt som er planlagt og sett i gang, seier Nordahl.