Eit nytt og betre liv

Det var ikkje slik dei hadde tenkt seg livet. For fire- fem år sidan braut ekteparet Sisco og Karl Viggo Waldersløw opp, tok farvel med institutt og bilkøar og kampen mot klokka og søkte ro og fred på eit veglaust, avfolka småbruk oppe i lia høgt over Vågåvatnet i Ottadalen. Ei knøtt lita tømmerstove mellom urd og stein, utan straum og innlagt vatn, var det som møtte dei då dei hadde baska seg opp den bratte råsa med sekk på ryggen. Men der hadde folket tent til livets opphald, ved å mjølke eit par - tre geiter, ved å yste ost, brenne tjøre og lage river og selje det dei hadde å by fram. Og folket på Heggerusten hadde funne meining med det dei gjorde.

Så primitivt ønskte dei nye busetjarane ikkje å leve. For pengane dei hadde fått ved å selje hus og institutt, bygde dei veg, dei bora etter vatn, og dei utvida husa, men slik at dei gamle tømmerstovene vart ståande som eit hjarte i det nye tunet.

Tanken til Sisco var at ho skulle gjere minst mogleg. Ho skulle vere heime, halde seg langt unna bil og butikk og gate og berre nyte naturen. Ho skulle ande inn rein luft ved å gå lange turar i skog og li. Etter kvart kom ho likevel til at noko av kunnskapen ho sat inne med, måtte komme andre til nytte, og gradvis tok ho til å byggje opp eit slags helsesenter der oppe i ura, eit annleis helsesenter. Ho bad eldre menneske i dalen til seg og gav verkande kroppar massasje og lækjande bad, og etterpå delte dei tid og erfaring over ein kopp te. Ingen brydde seg om klokka. Yngre menneske fekk også sine tilbod. Ein kveld i veka samlast dei til yoga i nyestova på Heggerusten, og etterpå sessar dei seg rundt eit bord som bognar av sunn, grøn mat.

Karl Viggo har arbeidet sitt i Lom og må framleis freiste pendlarlivet. Men på vegen til og frå arbeidsplassen møter han ikkje fleire bilar enn han kan telje på ei hand, og han veit på minuttet når han vil vere heime eller framme. Arbeidet går ut på å rettleie ungdommar som vil bu og studere heime framfor å reise til eit universitet eller ein høgskule. I dataalderen lèt det seg gjere, så sant dei har ein datakyndig med stor kompetanse til å hjelpe seg. Med sine opplevingar av storbylivet synest datamannen Karl Viggo at arbeidet er meir enn meinigsfylt.

Nybyggjarane på Heggerusten har fått eit nytt og betre liv.