Hopp til innhold

Tyrkia trugar med militært inngrep i nabolandet Syria

Verbale trugsmål og åtvaringar har så langt prella av den syriske presidenten Bashar al-Assad. No opnar Tyrkia for militær intervensjon dersom det ikkje blir slutt på blodbadet i nabolandet Syria.

Erdogan og Assad i februar 2011

I februar 2011, før uroa braut ut for fullt i Syria, var det framleis godt naboskap mellom Tyrkia og Syria. No trugar Tyrkia med militær intervensjon dersom overgrepa mot sivile syrarar aukar. På biletet: statsminister i Tyrkia Recep Tayyip Erdogan (t.v.) og presidenten i Syria, Bashar al-Assad.

Foto: - / Afp

Forhandlingane mellom Syria og Den arabiske liga står i stampe, og mange fryktar at det store skrekkscenarioet, nemleg borgarkrig, er i ferd med å bli ein realitet.

Tyrkia har lenge åtvara nabolandet i sør om sanksjonar dersom regimet ikkje set ein stoppar for massedrapa på sivile, som no er oppe i meir enn 3500. Men alle trugsmål har så langt prella av den upopulære presidenten Bashar al-Assad.

No seier kjelder i det tyrkiske utanriksdepartementet at Tyrkia ikkje utelukkar militær innblanding for å få slutt på den brutale nedslaktinga av syriske borgarar.

Ikkje mål om regimeendring

«Tyrkia motset seg unilaterale steg eller inngripen med mål om regimeendring i Syria, men utelukkar ikkje militær handling dersom regjeringsstyrkane i Syria begynner med massakrar i stor skala», opplyser kjelder i landets utanriksdepartement til tyrkisk media.

Ein militær inngripen vil med andre ord berre bli aktuelt dersom valden mot dei sivile blir kraftig forverra.

Ifølgje tyrkiske aviser har sentralmakta diskutert ulike inngrep, som å innføra eit flyforbod over Syria, eller ei buffersone mellom dei to landa for å beskytta sivile.

– Ja til Tyrkia, nei til Vesten

Sidan folkeopprøret mot Assad starta i mars i år, har mange tusen syrarar flykta over grensa til Tyrkia. Blant flyktningane er også soldatar som seier dei heller vil desertera enn å skyta sitt eige folk.

Det muslimske brorskapet, ei religiøs og politisk rørsle som er bannlyst frå Syria, opplyser at dei kan koma til å be om militær hjelp utanfrå for å stoppa blodbadet.

– Dersom det blir naudsynt med intervensjon, som til dømes flyforbod, vil regimet godta tyrkisk innblanding. Vestleg intervensjon er ikkje ønska, seier ein av leiarane for rørsla, Mohammad Riad Shaqfa som bur i eksil i Saudi-Arabia.

Demonstrasjonar i Kafranbel, Syria

Demonstrasjonar mot president Bashar al-Assad i Kafranbel, nær Adlb i Syria. Drapa på sivile i Syria held fram, trass i styresmaktene sine lovnader om å slutta å skyta mot demonstrantane.

Foto: HANDOUT / Reuters

Frå venskap til raseri

Tyrkia var lenge ein viktig støttespelar med gode relasjonar til Assad. I løpet av den åtte månader lange konflikten har landet vendt ryggen til det nådelause syriske regimet, og retta overraskande skarp kritikk mot naboen i sør.

Velviljen frå Tyrkia si side blei ytterlegare broten ned måndag, då tyrkiske pilegrimar blei angripne og såra ved ein kontrollpost på den syriske sida av grensa.

Pilegrimane var på veg heim etter å ha feira hajj i Saudi-Arabia då bussane dei køyrde i blei stoppa av menn i syriske uniformer. Soldatane begynte deretter å skyta på dei flyktande pilegrimane, opplyser passasjerar til tyrkiske fjernsyn.

Assad åtvarar mot militært åtak

Syrias president Bashar al-Assad

President Bashar al-Assad har hatt makta i Syria sidan han arva presidentvervetn frå far sin i 2000. Assad-familien har styrt landet i 40 år.

Foto: - / Afp

Statsminister Recep Tayyip Erdogan seier Assad-regimet har seg sjølv å takka for at det gode forholdet er ein saga blott, og spår at presidenten sine dagar ved makta snart er talde.

– Ein kan berre halda på makta ved hjelp av stridsvogner og kanonar opp til eit visst punkt. Dagen kjem då ein må gå, seier Erdogan

Statsministeren fordømmer valden mot «dei i Syria som krev eit verdig liv».

Men i eit ferskt og sjeldan intervju med ei britisk avis, viser presidenten Assad ingen teikn til å ville gje etter for det aukande presset. Han seier tvert imot at regimet vil halda fram med å slå ned på det kan kallar dissidentar.

Assad gjentek også trugsmålet om at eitkvart militært åtak på Syria vil føra til eit jordskjelv gjennom heile Midtausten.

Sanksjonar, ikkje intervensjon

Syria hadde frist til laurdag med å setja ein stoppar for valden mot demonstrantane i landet, men har ikkje godteke fredsplanen som Den arabiske ligaen har lagt fram.

Ligaen har dermed suspendert Syria som medlem i forbundet. Forbundet, som har 21 arabiske medlemsland, seier likevel klart nei til ein internasjonal intervensjon i landet

– Me ønskjer ikkje utanlandsk intervensjon i Syria. Me vil ikkje væpna opposisjonar eller innføra flyforbod, seier Sheikh Hamad bin Jassim, som er statsminister i Qatar, eitt av medlemslanda i Den arabiske liga.

I dag møter representantar for den syriske opposisjonen statsministeren i Storbritannia, David Cameron, til samtalar om situasjonen i Syria.

Demonstranter brenner portrettbilder av Assad

Demonstrantar brenn portrettbilete av president Bashar al-Assad.

Foto: KHALED DESOUKI / Afp

SISTE NYTT

Siste nytt