Syriske familiar hastar til grenseprovinsen Hatay ved Middelhavet på hjul eller til fots. Valden i heimlandet aukar, og presidenten har sett inn hæren for å knusa folkeopprøret mot han.
Berre i løpet av dei siste 24 timane har 1050 syriske borgarar kryssa grensa frå Syria til Tyrkia, opplyser det statlege tyrkiske nyheitsbyrået Anatolian torsdag.
- BAKGRUNN: Spørsmål og svar om Syria
- LES OGSÅ: Et nytt Syria i emning - men når?
– Held dørene opne
Det er ei kraftig og brå eskalering i talet på menneske som flyktar frå uroa i Syria. Talet er meir enn dobla på eitt døgn, frå 448 flyktningar i løpet av gårsdagen.
– Tyrkia kjem ikkje til å lukka dørene for syriske flyktningar, seier den tyrkiske statsministeren Tayyip Erdogan.
Dei fleste flyktningane kjem frå den nordvestlege byen Jisr al-Shughur, der 120 politimenn skal ha vorte drepne av regjeringsstyrkar fordi dei nekta å opna eld mot demonstrantane. Innbyggjarane fryktar no hemnoppgjer og nye opptøyar.
Dei vert tekne hand om av Raude halvmåne, som er søsterorganisasjonen til Raudekrossen i Midtausten. Menneska som rømmer frå grusomheitene i heimlandet vert innkvarterte i provisoriske teltleirar i grenseområdet.
Mange av flyktningane var også så hardt såra at dei måtte leggjast inn på tyrkiske sjukehus, ifølgje AFP.
- LES OGSÅ: Populær blogger bortført i Syria
(Artikkelen held fram under biletet)
FN krev valdsstopp
På grunn av den raskt aukande pågangen vurderer hjelpeorganisasjonen no å opna ein flyktningleir nummer to, ifølgje Anatolian.
Samstundes som den tyrkiske statsministeren tek imot syrarane med opne armar, oppmodar Erdogan også det syriske regimet til å få slutt på valdelege overgrep mot sivilie.
Også FNs høgkommisær for menneskerettar, Navi Pillay, ber inntrengjande om at Syria set ein stoppar for undertrykkinga av og overgrepa mot sitt eige folk.
– Det er uakseptabelt at styresmaktene i eit land nyttar vald for å få folket til å underkasta seg, seier Pillay i ei fråsegn torsdag.
Ho oppmodar regimet til å gje FN innpass i Syria og løyve til å etterforska alle rapportar om brot på menneskerettane i landet dei siste månadene.
- LES OGSÅ: Israel vil klage Syria inn for FN
For lite, for seint
Baath-partiet har hatt styringa i landet sidan 1963 - i 48 år, og president Bashar al-Assad har sete som president sidan tusenårsskiftet. Opprørarane i Syria krev at presidenten går av, demokratiske reformar og større politisk fridom.
I von om å få slutt på opptøyane, gav al-Assad nyleg generell amnesti til alle medlemmer av politiske rørsler. Han har i tillegg sleppt fri 450 politiske fangar frå syriske fengsel.
Men opposisjonen meiner det er for lite og for seint og nektar å avslutta demonstrasjonane før eit regimeskifte er eit faktum.
- LES OGSÅ: Ekspert: – Folket i Syria vil seire