Brannen spreier seg i eit enormt tempo på grunn av kraftig vind, og i kveld norsk tid kjem det meldingar om at luftkvaliteten i nabostaten New Mexico er trua på grunn av røyken. Røyken har også ført til problem for flytrafikken i området.
Brannen, som har fått namnet «The Wallow Fire» utvikla seg til å bli den nest verste nokon gong i Arizona, og brannmannskapa er langt frå å få kontroll over flammane.
Røykutviklinga har vore så stor at flya og helikoptera som pøser på vatn frå lufta har hatt problem med å sjå kvar flammane er.
Hittil er berre 10 bygningar gått med i brannen, men 2700 menneske har fått beskjed om å forlate heimane sine. Verst ser det ut for byane Eagar, Springerville, South Fork og Luna.