Djuptgåande endring på både økonomisk, politisk og sosialt plan skal diskuterast når Det Cubanske Kommunistpartiet held sitt første årsmøte på 14 år denne helga.
Partikongressen opna laurdag og vert omtalt som den viktigaste politiske hendinga sidan den karibiske øya innførte eit kommunistisk styresett etter sovjetisk modell i 1975.
Kven tek over?
Møtet kan markera byrjinga på slutten for regimet som har styrt Cuba sidan revolusjonen i 1959.
Det er venta at det etterkvart svært så gråhåra leiarskapet vil leggja fram ein overgansplan med framlegg til potensielle etterfølgjarar som kan ta over stafettpinnen etter Castro-brørne.
- LES OGSÅ: Castro forkastar cubansk kommunisme
- LES OGSÅ: Castro: – Jeg har blitt misforstått
Blant mange cubanarar er optimismen stor, men ikkje alle har dei store forhåpningane til det ekstraordinære møtet.
– Her finst mange unge folk fulle av idear og interessante innfallsvinklar til ulike problem og utfordringar i samfunnet, men dei slepp ikkje til, seier Eloy Gutierrez Menoyo til Reuters.
(Artikkelen held fram etter biletet)
– Diktaturet held fram
Gutierrez Menoyo kjempa side om side med Fidel og Raúl Castro under den Cubanske Revolusjonen. Han vart i ettertid stempla som opposisjonell og straffa med 22 år i fengsel.
No er han leiar for den politiske rørsla «Cuban Change», og framleis sterkt kritisk til det «mafiaorganiserte maktmonopolet som Castro-brørne tviheld på».
– Dei ønskjer å halda fram med diktaturet ved å rekruttera frå eigne rekkjer i partiet. Og dette er eit diktatur som i over 50 år har vist at det ikkje fungerer og at det trengs endringar over heile fjøla, seier Gutierrez Menoyo.
(Artikkelen held fram etter biletet)
Tikk takk
Den Cubanske revolusjonen tok slutt den 1.januar 1959 då den USA-støtta diktatoren Fulgencio Batista flykta frå øystaten og etterlét seg eit maktvakum som Fidel Castro raskt stod klar til å fylla.
Den i dag 84 år gamle Fidel gav i 2006 frå seg makta til sin yngre bror Raúl på grunn av skrantande helse. Sidan Raúl formelt tok over makta i 2008 har han pressa på for økonomiske reformar av den planstyrte sovjet-modellen.
- LES OGSÅ: Cubanere får starte små bedrifter
Han har også erkjent at tida er i ferd med å renna ut for han og og resten av den politiske toppleiinga, der mange er avdanka geriljasoldatar frå den same nostalgiske revolusjons-generasjonen.
– Den sjette partikongressen bør bli den siste for mange av oss som høyrer til den historiske revolusjonsgenerasjonen. Tida me har att er lita, oppgåva framfor oss er enorm, sa Raúl Castro for tre år tilbake.
(Artikkelen held fram etter biletet)
– Me står klare til å ta over
Visepresident i den amerikanske tenketanken Lexington Institute, Philip Peters, seier til Reuters at Kommunistpartiet har teke nokre unge medlemmer under vengene, men at eit generasjonsskifte truleg ikkje vil skje med det første.
– Den gjennomsnittlege statsråden er rundt 50 år gammal, så til desse høge verva er det teke inn folk frå ein yngre generasjon. Men ingen har førebels utposisjonert seg som ein ny, karismatisk leiartype. Spørsmålet om kven som skal fylla Castro sine sko er framleis ubesvart, seier Peters.
- LES OGSÅ: Cuba vil inn i varmen
Den 25-år gamle cubanaren Eduardo Díaz Collazo meiner at hans generasjon står klar til å fylla skoa.
– Unge cubanarar vil halda seg på den stien som dei før oss har meisla ut, fordi me har tilbrakt heile vår oppvekst under deira styresett. Når tida er inne, vil me vera godt budde til å ta over. Me er klare for det, seier Díaz Collazo til Reuters.