– Eg hadde veldig flaks

Jonas Hanssen er utvekslingsstudent i byen Sendai, som vart hardt råka av jordskjelvet fredag . Han hadde skulefri og var heime då skjelvet kom.

18-åringen innrømmer at det først var spennande.

– Men plutseleg starta det å riste for alvor, og vi måtte ta tak i gelenderet på verandaen for å halde oss på beina, seier han.

– Hadde veldig flaks

Først dagen etter forstod han kor ille det var.

– Då skjelvet kom, var eg plassert ganske høgt oppe. Eg forstod ikkje kor ille jordskjelvet var før dagen etter, då eg fekk sett i avisene, seier han til NRK.

No innser han at han var heldig.

– Eg har verkeleg hatt veldig flaks. Eg har ikkje blitt skadd på nokon måte. Vertsfamilien har ikkje lidd noko skade, og huset står enno, seier han.

• Les også: Alle savnede nordmenn i Japan er funnet

– Det verste som kan skje

Først i går, søndag, fekk familien heime i Noreg vite at sonen var i god behold.

– Det er nesten ikkje råd å beskrive med ord, seier far Bjarne Håkon Hanssen, tidlegare statsråd for Arbeidarpartiet.

– Ein har jo høyrd mange gonger i livet at det å verkeleg bli redd for at noko har skjedd med barna, er det verste som kan skje. Det kan eg stadfeste. Slik er det, seier han.

• Les: Jippi! Vi har fått beskjed om at Jonas har det bra!

Ingen plan om heimreise

Sonen fortel frå Japan at det er kaotisk i landet, og at dei manglar både mat og drikke. I tillegg er alle uroa for strålefaren som er meldt.

– Det skal visst ikkje vere større fare. Om det likevel viser seg å vere det, så har dei no fått kontaktinforamasjonen min, og kan ta kontakt, seier son Hanssen.

Enn så lenge har han ingen planar om å reise heim til Noreg.

– Det var rett nok matmangel dei første dagane, men ein ting kan ein trygt seie om folket her, og det er at dei er veldig orienterte.

– Det har verkeleg skjedd store framsteg her berre på nokre få dagar. Vi har allereie fått straumen tilbake, og det blir ordna mykje slik at ein alltids kan få tak i mat og drikke, seier han.