Ber om «fred» med Sør-Korea

– Konfrontasjonar mellom Nord- og Sør-Korea bør bli avdramatiserte så snart som råd, skriv tre av dei største avisene i Nord-Korea i ein felles leiarartikkel på første nyttårsdag.

Dei ber om dialog og samarbeid for å kjøle ned det oppheta forholdet mellom naboane.

– I år bør vi gjere eit meir målretta forsøk på å betre forholda mellom dei koreanske landa. Vi må aktivt prøve å skape eit miljø som legg til rette for dialog og samarbeid mellom Nord- og Sør-Korea ved å sette felles interesser over alt anna.

«Kjernefysisk holocaust»

Artikkelen er skriven av det offisielle statlege nyheitsbyrået. Men sjølv om artikkelen løfta fram sitt ønske om eit betre forhold mellom landa, åtvara dei også Sør-Korea om følgjene av å ikkje samarbeide, skriv nyheitsbyrået AFP.

– Om ein krig bryt ut her, vil det garantert føre til eit kjernefysisk holocaust, skriv dei.

Etter at den yngste sonen til Kim Jung-il kom inn i maktbiletet i september, har det vore fleire militære konfrontasjonar mellom landa.

Kim Jung-un vart oppnemd til firestjerners general, fekk ein leiarposisjon i staten og starta å vise seg saman med faren på offisielle tilstellingar.

Det er venta at han vil ta over etter faren som blir vurdert til å ha sviktande helse.

• Les også: Tror angrepet skyldes lederskifte i Nord-Korea

– Kim Jung-un festar grepet

Nord-Korea har vist militære musklar ved å bombe øya Yeounyeong , der to sivile og to sørkoreanske soldatar vart drepne. Sør-Korea har halde militære øvingar i same området sjølv om Nord-Korea åtvara om at ei slik handling ville føre til atomkrig .

• Les også: – Ingen vits å reagere på øvinga

Tidlegare i 2010 skulda Sør-Korea nabolandet for å senke eitt av deira krigsskip nær den omstridde grensa mellom landa i Gulehavet. Nord-Korea avviser klagane.

No meiner ein professor og Nord-Korea-ekspert at landet vil prøve å halde området stabilt i ein periode der Kim Jung-un skal ta over og feste grepet på makta i Nord-Korea.

– Artikkelen hintar om at Nord-Korea vil vente til etter eit møte mellom Kina og USA denne månaden, og ei militørøving som USA og Sør-Korea skal halde i mars, før dei vil bestemme seg for om dei vil gå i konfrontasjon eller dialog med Sør-Korea, seier Yang Moo-Jin ved Universitetet i Seoul til AFP.

Nord-Korea trekte seg frå seksnasjonarsamtalane mellom dei to koreanske landa, USA, Russland, Kina og Japan i april 2009. Samtidig kasta dei ut FN-inspektørar, noko som har ført til frykt om at landet kan vere på veg til å utvikle atomvåpen.

• Les også: – Nord-Korea tillatter atominspeksjoner