Nepalsk fredspolitikar er død

85-åringen døydde av ein luftvegsinfeksjon etter lang tids sjukdom.

Tidlegare statsminister i Nepal, Girija Prasad Koirala, er død.

Foto: Gurinder Osan/Scanpix/AP

Koirala spelte ei dominerande rolle i nepalsk politikk i mange år, men vil bli hugsa for fredsavtalen han inngjekk med maoistane i 2006.Dette skjedde etter ti år med borgar­krig, som kosta 13.000 menneske livet.

Utset besøk

Erik Solheim skulle ha reist på besøk til landet måndag, men turen er no utsett fordi det er erklært landesorg.

- Hans rolle var avgjerande i forsoningsprosessen med maoistane, seier Erik Solheim til NTB.

Fredsavtalen bana også veg for avskaffinga av kongedømmet,etter 239 år med monarki i Nepal. Kongehuset var ein flaskehals når det gjaldt innføring av demokrati, og på 1960-talet sat Koirala sju år i fengsel for å ha protestert mot kongen.

Koirala var avgjerande for fredsavtalen, seier utviklingsminister Erik Solheim.

Foto: Tore Meek/Scanpix

I 1991 vart han den første valde statsministeren i Nepal.

- Forsonande vesen

- I kraft av sitt forsonande vesen hadde han ein autoritet som gjekk utanpå alle andre i Nepal, seier Erik Solheim.

Maoistleiaren Pprachanda sa i dag at dødsfallet er eit hardt slag for fredsprosessen og arbeidet med å få laga ei ny grunnlov.

Erik Solheim meiner det er for tidleg å seie noko om kva verknad Koiralas død kjem til å få på den skjøre politiske situasjonen i landet.

- Han var sjuk lenge før han døde, men tok likevel mot besøk. På mange måtar har han vore limet som har halde fredsprosessen saman, men det er for tidleg å seie kva verknad dødsfallet vil ha, seier Erik Solheim.