1,2 milliardar menneske svelt

For eitt år sidan var matkrisa sentral i nyheitsbildet, men i dag høyrer vi nesten ingen ting om problemet.

Realiteten er at endå fleire menneske svelt no. Matvareprisane er framleis er høge, samtidig har finanskrisa gjort folk fattigare.

Stig kraftig

Jayati Ghosh ved Nehru-universitetet i New Dehli påpeikar at finanskrisa har skubba matkrisa ut frå overskriftene i media.

- Då matkrisa skapte overskrifter i fjor, var langt færre ramma. No er det offisielt hungersnaud i nesten 40 land, seier økonomiprofessoren.

I dag er det 1,2 milliardar menneske som ikkje får tilstrekkeleg næring. Talet på folk som svelt er har aldri før stige like kraftig som det siste året.

- Ein av seks menneske har ikkje tilgang til nok mat, sa generalsekretæren i FNs matvareprogram Jacques Diouf på ein pressekonferanse nyleg.

Manglande kontroll

Den aukande hungersnauda dei siste åra har hovudsakleg skuld i økonomiske sjokk. Både matvareprogramet til FN og Jayati Ghosh meiner spekulasjon i matvarer står bak prissjokka.

- På same måte som manglande kontroll over finansmarknadene førte til bobler og finanskrise, førte manglande kontroll med råvarespekulantane til matkrisa, meiner Ghosh.

Da finanskrisa kom, fall ikkje matprisane for fattige folk. Deira eigen valuta fall, og i tillegg blei svært mange fattigare eller arbeidsledige på grunn av økonomisk tilbakegang.

- Forferdeleg for smårollingar

Finanspolitisk talsmann i Senterpartiet, Per Olaf Lundteigen, meiner ein må leggje om den internasjonale matvarepolitikken for å unngå liknande svoltkatastrofar i framtida.

- Matpolitikken må baserast på større produksjon og meir stabilitet. Det er kvinner og barn som blir hardast ramma. Smårollingar som ikkje får nok mat blir varig skadd, det er heilt forferdeleg, seier han.