100.000 for Gaza-retrett

Den israelske fredsrørsla arrangerer demonstrasjonen i Tel Aviv. (Foto: Reuters/Scanpix)

13 israelske soldatar er drepne på Gazastripa denne veka, og dette har gjort at kravet om å trekkje soldatane og busetjarane ut av Gazastripa har auka i styrke i Israel.

Det var den israelske fredsrørsla som arrangerte demonstrasjonen i kveld, og arrangøren har uttrykt håp om at demonstrasjonen kunne bli den største på fleire år i Israel.

7500 israelarar bur på den tett befolka Gazastripa blant 1,3 millionar palestinarar.

Statsminister Ariel Sharon har foreslått ei israelsk tilbaketrekking frå Gazastripa, men har ikkje fått støtte i sitt eige parti, Likud.

Ein av talarane på Rabin-plassen i Tel Aviv i kveld var leiaren for det største opposisjonspartiet, Arbeidarpartiet, Shimon Peres. Han oppmoda Ariel Sharon til å gå vidare med planen om ei israelsk tilbaketrekking frå Gazastripa.

Det er uklart kor mange menneske som har vore med på demonstrasjonen i kveld, men nokre kjelder seier at så mange som 200.000 deltok. Arrangøren tippar at det er snakk om rundt 150.000.