– Eg kjem ikkje til å tvinge mannen min til å trene meir, spøkte Michelle Obama, og møtte latter frå pasientar og foreldra deira, då ho i går besøkte barnesjukehuset «Children’s National Medical Center» i Washington.
Ifølge kona skal treningsklede også ha vore ønsket til ein av verdas mektigaste menn. Hundane, Bo og Sunny kjem derimot til å få tyggeleiker til jul, medan presidentens døtrer ikkje har noko særleg lang ønskjeliste.
– Malia ville ha ein mobiltelefon, men så kjøpte faren hennar ein mobil til ho. Då sa eg «Du øydela alt! Det skulle vere ei julegåve», fortalde Michelle til borna på sjukehuset, ifølgje nyheitsbyrået AP.
Det er uvisst om fyrstedama eigentleg hadde planar om å røpe såpass mykje om kva som hamnar under Obama-familiens juletre, og ho sa heller ikkje så mykje om det ville kome fleire gåver frå ho til familien.
Men Michelle fortalde derimot meir om kva filmar og mat ho likar best til jul. Gresskarpai er favorittmaten, medan ho helst ser «A Christmas Story», «It’s a Wonderful Life», og «A Charlie Brown Christmas» på TV-en.
Over nyttår er det duka for ytterlegare festing for presidentkona når ho feirar sin 50-årsdag. Då kunne det fort hende at det vart litt fest og dans, sa Obama til dei frammøtte på barnesjukehuset i Washington.