Avslørte manglande kontroll med frivillige barneheim-hjelparar

Ein reporter i programmet Kaliber i Sveriges Radio ville teste kor lett det var å få innpass som frivillig på ein barneheim i Kambodsja. Han tok kontakt med eitt av dei største selskapa for formidling av slike reiser, Projects Abroad , som også har ei avdeling her i landet.

Les heile reportasjen her: Barneheimar ny arena for pedofile

Projects Abroad har strenge reglar for bakgrunnssjekk av frivillige, blant anna skal det krevjast at søkjaren legg fram politiattest av ny dato. Det skal også leggjast fram referansar.

To veker på barneheim

Reporteren i Kaliber fortel at han søkte Projects Abroad om å få jobbe to veker som frivillig på ein barneheim i Kambodsja. Han fortel at han ikkje la fram politiattest, og at selskapet ikkje ringde referansen han gav dei.

Vel framme i Kambodsja jobba han med 24 born, ofte heilt utan at det var andre vaksne til stades. Han får også ta med seg born ut av barneheimen utan at andre vaksne er med.

– Trass i at ingen kjende bakgrunnen min, så var det ikkje nokon som hindra meg i å ta med fem born ut av barneheimen, fortel reporteren.

LES OGSÅ: Hjelpearbeidar hardt ut mot frivillig-turisme i fattige land

– Brot på alle rutinar

Lars Lindberg på Projects Abroads kontor i Sverige vedgår at selskapet i denne saka har brote alle sine rutinar, og at han er svært lei seg for det som har skjedd.

– Eg har ingenting å seie til vårt forsvar. Dette skal normalt fungere, seier han til Sveriges Radio.

Rana Flowers, som leier FNS barneorganisasjon UNICEFs organisasjon i Kambodsja, seier til SR at det er eit stort problem at utanlandske frivillige ikkje blir sjekka grundig nok av selskapa som sender dei dit.

– Det er ikkje tvil om at det er pedofile blant dei som søkjer seg til frivillig arbeid ved barneheimar i Kambodsja, seier ho.

Pedofile til Kambodsja

Også tidlegare landsjef i Asia for Redd Barna, Markus Aksland, seier at mange pedofile no vel å reise til Kambodsja, etter at naboland som Thailand og Filippinane har innført strengare straffer for vaksne som forgrip seg på born.

Han har inntrykk av at styresmaktene i Kambodsja arresterer og stiller for retten ein person no og då berre for å vise at dei gjer noko, og at det blir sett mellom fingrane med slike saker mesteparten av tida.

– Born er ikkje særleg høgt prioritert i dette landet, seier Aksland til NRK.no.

For fire år sidan vart ein nordmann dømd til fengsel i 18 månader for kjøp av seksuelle tenester av ein mindreårig gut i Kambodsja.