– Me ber om å bli tilgjeve av samfunnet, med Gud som vitne, om me har vore årsak til smerte. Me ber også om at styresmaktene tilgjev oss, sa eit av medlemmene i MS-13-gjengen til Reuters, då to av dei verste gjengane i Honduras arrangerte pressekonferanse for å kunngjere våpenkvila dei har inngått.
Glad president
I Honduras vert det for kvar 100.000 innbyggjar drepne 87 personar. Det gir landet førsteplass på oversikta over landa med flest drap i verda. I dag var det mang ein honduranar som pusta letta ut då to av dei verste gjengane slutta fred, etter at kyrkja i Honduras har drive mekling mellom dei to gruppene i lang tid.
– Det er offisielt. Dei to gjengane ønskjer å forsonast med folket og det honduranske samfunnet. Dette er eit viktig skritt, og no må me alle hjelpe til for at dette vert gjennomført, sa biskop Romulo Emiliani til Reuters.
LES OGSÅ:
LES OGSÅ:
Biskopen har vore sentral i forhandlingane mellom dei to gjengane. Som ein liten premie for biskopen venta ein gratulasjon frå president i Honduras, Porfirio Lobo, som er godt nøgd med våpenkvila.
– Eg ringte biskop Emiliani for å gratulere han. På vegner av folket i Honduras vil eg takke han for det han har fått til, sa ein glad president.
Ekspert: – Avtalen vil hjelpe
Dei store gjengane har fått stor makt i Honduras på grunn av narkotikatrafikken som går gjennom landet.
– Frå land som Bolivia og Colombia går narkotrafikken gjennom Mellom-Amerika, mot USA. No er det slik at meksikanske narkokartell kontrollerer denne trafikken, og dei rekrutterer i større grad ungdommar frå desse gjengane, seier Siri Blaser i den katolske hjelpeorganisasjonen Caritas.
Ho har jobba med å hjelpe tidlegare gjengmedlemmar. Ho trur dagens avtale vil fungere, og viser til ein liknande avtale som vart gjort i nabolandet El Salvador i fjor.
– Drapsstatistikken har gått ned 52 prosent sidan avtalen vart underteikna i El Salvador, og det vekker sjølvsagt oppsikt, seier Blaser.