Her jobbar Kripos i Algerie

Ei gruppe på sju personar frå Kripos blei førre veke sende til likhuset i Algerie for å identifisera dei drepne under det fem dagar lange terroråtaket mot gassanlegget i In Amenas, som blir drifta av Statoil, BP og Sonatrach.

Gruppa består av kriminalteknikarar, rettsodontologar og rettspatologar. Dei har samarbeidd med ekspertar frå andre land i samband med identifiseringa. Så langt er fire av dei fem sakna Statoil-tilsette identifiserte og stadfesta døde.

Men framleis jobbar Kripos-gruppa for fullt med å finna den siste, Statoil sin landsjef og områdedirektør i Algerie, Victor Sneberg (56).

• LES OGSÅ: Statoil kan trekkja seg ut av Algerie

Fjerde identifisert

Den norske ID-gruppa blir i landet fram til alle dei norske er identifiserte, seier Kripos-overbetjent Håvard André Aalmo til NRK i Alger:

– Me har framleis undersøkingar av dei omkomne og levningar som gjenstår. Det vil me fortsetja med på søndag om måndag.

Den norske gruppa har også bidrege til at tre britar, to japanarar og to offer frå Malaysia har blitt identifiserte.

Statoil opplyste i ei pressemelding laurdag om at den fjerde av dei fem sakna norske medarbeidarane, Alf Vik (43), er stadfesta død.

Tore Bech (58), Thomas Snekkevik (35) og Hans M. Bjone (55) er også blant dei totalt 38 gislane frå åtte land som blei drepne.

I tillegg til id-gruppa er fleire Kripos-etterforskerarar i Algerie for å avhøyra overlevande og kartleggja kva som skjedde på anlegget under åtaket.