Av
Bent J. Tandstad
|
MIlitsen til al-Sadr i Najaf er tungt væpna, og har ikkje planar om å overgi seg. (Foto: AFP/Scanpix) |
Ein korrespondent for nyheitsbyrået Reuters seier at tilhengjarane av den ytterleggåande leiaren Moqtada al-Sadr kontrollerer både sjølve moskeen og gatene rundt.
Eksplosjonar
Det var i morgontimane i dag fleire kraftige eksplosjonar i området, men det er uklart kva som forårsaka desse. Ein opprørssoldat som Reuters har snakka med seier at det var angrep frå amerikanske fly, men dette er ikkje stadfesta av andre kjelder.
Ein av talsmennene til Moqtada al-Sadr seier at det blir starta nye forhandlingar om Imam Ali-moskeen, den fjerde mest heilage staden for sjiamulsimar i verda, om kort tid. Talsmannen seier at medarbeidarar av storayatolla Sistani skal delta i forhandlingane.
Sistani
Han tek opp att opprørarane vil overlate Imam Ali-moskeen til representantar for storayatollaen. Sistani er den øvste leiaren for sjiamuslimane i Irak, og ligg for tida på sjukehus i London.
Den same talsmannen seier også at Mehdi-hæren, som opprørsmilitsen til Moqtada al-Sadr kallar seg, vil halde fram med å vakte Imam Ali-moskeen etter ei overlevering til Sistanis folk.
I går vart det meldt at opprørarane hadde overlevert nøklane til Imam Ali-moskeen til Sistanis folk, men i dag blir dette avkrefta.
Det irakiske innanriksdepartementet melde også i går at politistyrkar hadde teke kontroll over moskeområdet, noko som viste seg å vere rein feilinformasjon. Det vart også sagt at 400 opprørarar var arresterte, men truleg er også dette feil.
Al-Sadr
Det er uklart kvar opprørsleiaren al-Sadr oppheld seg, men i går vart det spekulert i om han hadde reist frå Najaf i løpet av natta før. Andre kjelder seier at han framleis er i Najaf, og at han ikkje kjem til å overgi seg til irakisk politi eller dei amerikanske styrkane som også står i byen.
Det var relativt roleg i Najaf i natt, medan det var harde kampar i nabobyen Kufa 10 kilometer aust for Najaf. Kampane heldt på i tre timar, og gjekk føre seg like ved moskeen og ein rettsbygning i byen.