- Til siste blodsdrope

Av Bent J. Tandstad

Noqtada al-Sadr vil kjempe til siste blodsdrope. (Foto: AP/Scanpix)

- Eg kjem til å forsvare Najaf til min siste blodsdrope, sa han på ein improvisert pressekonferanse i Imam Ali-moskeen i Najaf i dag, medan lyden av maskingevær og artillerigranatar gav gjenklang inne på moskeområdet.

Fiende av Amerika

- Eg er ein fiende av Amerika og Amerikna er min fiende til dommedag, sa han, og avviste oppmodinga frå Iraks statsminister Iyad Allawi om å leggje ned våpna og reise frå Najaf.

- Okkupantane må vekk, og då kan den demokratiske prosessen starta. Eg blir her for å støtte militsen, og eg ber alle religiøse leiarar om å gjere det same, sa Moqtada al-Sadr til dei frammøtte journalistane.

Han la til at dei som kjempar mot amerikanarane i Najaf, forsvarar islam og den heilage byen.

Det har vore harde kampar i Najaf dei siste dagane, og det har vore brukt både fly, stridsvogner og artielleri i angrepa på støttespelarane til al-Sadr. Opprørarane held til rundt den heilage moskeen Imam Ali og den store gravplassen der.

Iranske våpen

Iraks forsvarsminister Hazem Shaalan åtvarar om at den irakiske hæren kan gå saman med amerikanarane i kampane mot Sadr-militsen, som han seier får våpenhjelp frå nabolandet Iran. Al-Sadr omtalte i dag Iran som ein kjær nabo, men han la til at det berre er Gud, og ikkje Iran, som gir militsen styrke til å forsvare seg.

Hazam Shaalan kalla militsen ei samling forbrytarar som får våpna sine frå Iran.

Amerikanske militære kjelder seier dei har drepe meir enn 360 medlemer av den radikale militsen dei siste dagane. Dette blir blankt avvist at ein talsmann for al-Sadr, som seier at berre 15 frå militsen er drepne, og at 35 andre militsmedlemer er skadde.

Innbyggjarar i Najaf seier til nyheitsbyrået AFP at dei trur fleire hundre menneske har mist livet i kampane i byen dei siste dagane.

Basra

Irakiske styresmakter er redde for at uroa i Najaf skal spreie seg til andre sjiamuslimske område i Irak. Det ulmar i Basra, og i dag var det store demonstrasjonar i byen til støtte for al-Sadr og militsen som kjempar mot amerikanararne i Najaf.

Ein britisk militær talsmann seier til nyheitsbyrået Reuters at situasjonen i byen er ekstremt spent. Minst eit britisk militært køyrety er sett i brann av demonstratar, og det vart skote mot britiske soldatar både med handvåpen og granatar.

Demonstrantar sette fyr på eit britisk militært køyrety under uroa i Basra i dag. (Foto: Reuters/scanpix)