|
Fire menneske vart drepne i angrepet på eit pansra sivilt køyrety i Bagdad i dag. (Foto: AFP/Scanpix) |
Av
Bent J. Tandstad
Ein talsmann for den amerikanske okkupasjonsstyrken opplyser at alle dei fire var utlendingar, og at minst to av dei var frå Storbritannia.
Tryggingsfirma
Nyheitsbyrået Reuters melder at bilen som vart sprengd tilhøyrde eit privat tryggingsfirma som har oppdrag for den amerikanske okkupasjonsstyrken. Ei kjelde seier til byrået at bilen vart treft av ein rakettdriven granat.
Sist måndag vart presidenten i det USA-innsette styringsrådet, Ezzedine Salim, drepen i ein bombeeksplosjon ved ein annan inngang til det amerikanske hovudkvarteret, den såkalla grøne sona.
Det amerikanske hovudkvarteret vart skaka av ein kraftig eksplosjon i føremiddag, og det vart sett svart røyk stigande opp frå området. Det er førebels uklart kva eksplosjonen skuldast, men området blir stadig vekk utsett for angrep med rakettar og granatar.
1200 drepne
Nesten 1200 irakarar er drepne og 2350 er såra i Irak sidan 5. april, opplyser det irakiske helsedepartementet. Talet omfattar dei som er drepne i kampar i den sunnimuslimske byen Falluja og dei sjimasuslimske heilgane byane sør for Bagdad.