- Noreg kan delta i Irak

Det er venta at spørsmålet om norsk deltaking i ein internasjonal stabiliseringsstyrke for Irak vil bli diskutert i eit møte mellom den norske og den danske forsvarsministeren i morgon. USA har bede Danmark om å leie ein slik styrke, og danske styrsmakter har bede Noreg om å delta.

Kjell Magne Bondevik opnar for norsk deltaking i ein internasjonal Irak-styrke, men set fleire vilkår.

Statsminister Kjell Magne Bondevik (KrF) seier at det er ein viktig føresetnad for norsk deltaking i ein Irak-styrke at etableringa av ein slik styrke blir gjort med eit klart folkerettsleg grunnlag. Vidare at FN sitt forhold til ein slik styrke også er avklart, og eventuelt også NATO si rolle.

Bondevik presiserer at ein styrke med norsk deltaking ikkje må vere ein del av ein okkupasjonssstyrke, men at norsk deltaking også må sjåast i samanheng med innbyggjararne i Irak sine behov for humanitær hjelp.

Han understrekar at det enno ikkje er klart om Noreg kjem til å delta i ein internasjonal stabiliseringsstyrke, men et Irak no treng meir enn noko anna er humanitær bistand.

USA har tenkt å dele Irak inn i fem sektorar, og Danmark skal ansvaret i ein av desse sektorane. Det er her Noreg er tiltenkt ei rolle. (NRK)