Norske Nanna Cecilie Lone slutta seg spontant til då irakarar og iranarar demonstrerte utanfor den amerikanske ambassaden i Oslo i føremiddag, i protest mot det USA-leia angrepet på Irak.
Av Bjørn Christian Jacobsen og
Tor Helge Haugland
- Dei drep uskuldige, dei drep ikkje Saddam, seier Nanna Cecilie Lone (17) der ho har stilt seg opp med store plakatar framfor ambassaden i Drammensveien.
- Bush seier at han skal bombe der Saddam Hussein er, men det er feil. Sist dei bomba i Afghanistan, trefte dei sjukehus og andre sivile mål, tordnar Lone, som fortel at ho blei redd og forbanna då ho høyrde meldingane om krig på radioen i dag tidleg.
- Eg tenkte at no må eg få fram mi meining. Derfor er eg med på demonstrasjonen, seier ho. - Det er berre bullshit det Bush seier, legg ho til.
Stortinget
 |
| Framfor den amerikanske ambassaden var vakthaldet kraftig forsterka med væpna politifolk. (Foto: NRK/Tor Helge Haugland) |
Irakarane og iranarane demonstrerte først framfor Stortinget, før dei gjekk vidare til den amerikanske ambassaden.
På det største banneret var det krav om at krigen må stansast straks, og på mindre plakatar var det slagord om at barn og sivile blir hardt ramma av krig.
Det massive oppbodet av politi utanfor ambassaden følgde nøye med, men greip ikkje inn mot dei rundt 50 demonstrantane som samla seg på motsett side av gata med taktfaste rop av slagord mot krigen.
"Stopp krig no" og "Nei til krig, nei til Saddam", lydde det.
Den amerikanske ambassaden har heilt sidan terroraksjonen i USA 11. september 2001 hatt eit forsterka vakthald, og fått fysiske skilje mot gatetrafikken utanfor.
Imot Saddam
 |
| Kamil Ahmed er frå Nord-Irak og har ikkje sove heile natta fordi han tenkte på dei som bur i landet. (Foto: NRK/Tor Helge Haugland) |
Kamil Ahmed, som er leiar for den norske avdelinga til Arbeidarkommunistpartiet i Irak, understrekar at demonstrantane er imot regimet til Saddam Hussein, men meiner at den USA-leia krigen berre gjer vondt verre.
Ahmed kjem sjølv frå Nord-Irak, og fortel at han eigentleg ikkje har sove heile natta fordi han har tenkt på forholda for dei som bur i landet under ein krig.
- Det er 25 millonar menneske der nede, og vi er svært bekymra for dei, seier han, og understrekar at kravet er at krigen må stansast straks.
Kamil Ahmed seier også at dette er ein dag der medlemer av arbeidarkommunistpartia i Irak og Iran i felleskap deltek i demonstrasjonar mot krig i fleire av storbyane i Europa.
Også fleire av dei tilfeldig forbipasserande i Drammensveien stansa og gav uttrykk for støtte til demonstrantane. Fleire fotgjengarar brukte plystring og fingerspråk for å uttrykkje misnøye med USA.
Skjerpa beredskap
 |
| Også ved den britiske ambassaden i Thomas Heftyes gate var vakthaldet forsterka. (Foto: NRK/Tor Helge Haugland) |
Politiet i Oslo har skjerpa beredskapen ved fleire ambassadar etter krigsutbrotet.
Dette har førebyggjande karakter. Vi har ikkje opplysningar om at det er auka terror-risiko, opplyser Oslo politikammer.
Framfor den amerikanske ambassaden var vakthaldet kraftig forsterka med væpna politifolk.
Også ved den britiske ambassaden i Thomas Heftyes gate på Frogner var vakthaldet forsterka, og fleire politifolk og bilar stod oppstilte utanfor.
Det var også innført stans forbode for passerande bilar.
Tips andre om denne saken
Utskriftsvennlig versjon
