Ifylgje samanslutninga til dei plastiske kirurgane i Tyskland, blir det gjennomførd om lag 100.000 plastiske operasjonar på unge under 20 år kvart år.
Hiv seg på nødbremsen
Onsdag gjennomførde Forbundsdagen i Berlin ei høyring om kva ein bør gjere med det stigande talet på plastiske operasjonar blant unge kvinner.
Karl Lauterbach i det tyske Sosialdemokrati, har bestemt seg for å trykkje på nødbremsen. Initiativet hans blir støtta av koalisjonspartnarane i den tyske regjeringa.
- Ynsket om ein ny barm er ikkje uvanleg blant unge jenter lenger, seier Lauterbach som er professor i medisin ved universitetet i Köln.
Vil ha større bryst
Kvart femte tyske barn mellom 9 og 14 år ynskjer seg ein plastisk operasjon. Lauterbach synes det er perverst at å gjere inngrep på kroppen for å passe inn i ideala til motebransjen.
- Dei som forstørrar barn sine bryst, eller sug dei for feitt, er totalt useriøse, meiner han.
Allereie i 2002 kom Europaparlamentet med oppmoding om at medlemslanda i EU berre godkjenner brystimplantat til kvinner under 18 år, viss det skjer ut i frå medisinske årsaker.
Åtvarar mot kvakksalvarar
Dei tyske plastiske kirurgane går i mot ei lov som gjer det ulovleg å utføre inngrep på mindreårige.
Den tyske regjeringa vil undersøke korleis ein kan stoppe misbruk i samband med plastiske operasjonar, og verne forbrukarane mot kvakksalvarar innan for den plastikkirurgiske bransjen.
