Aksjekursane lyste illraudt i Mumbai allereie ved opninga av børsen. Handelen vart stoppa i ein time då det viste seg at indeksen gjekk tilbake med nesten 10 prosent. Meklarar og marknaden måtte få tid til å kjøle seg ned.
Kraftige tilbakeslag
I Japan kunngjorde sentralbanken at dei ikkje hevar den svært låge renta i landet. Likevel fall Nikkei-indeksen på børsen i Tokyo kraftig og illevarslande. Då børsen stengde hadde indeksen gått tilbake med 5,7 prosent.
Børsen i Malaysia, Filipinane, Taiwan og Sør-Korea går også kraftig attende.
Økonomien i Kina har til no vore lite påverka av uroa på børsen i resten av verda, men i dag tidleg fall kursane. I Hong Kong gjekk indeksen ned med åtte prosent. Børsen i Singapore hadde ein vekst på heile 96 prosent i fjor. I dag fekk børsen eit kraftig tilbakeslag.
Trur på vekst
Det er ingen lyspunkt på børsane i Asia i dag. Mange økonomar meiner at det ikkje er nokon krise i denne verdsdelen. Dei hevdar det berre ein mellombels situasjon prega av nervøsitet.
Ekspertane meiner at asiatisk økonomi er sterk nok til å tåle eit tilbakeslag i amerikansk økonomi. Ekspertane trur på rundt 10 prosent vekst i India og Kina i år.
Australia merkar også den økonomisk uroa. Tilbakegangen på Sidney-børsen er den lengste på 26 år.
Det er knyta stor spenning til korleis den amerikanske børsen reagerer når den opnar i dag.