22. juli 2011 har endra Norge. Dette var dagen då ei bombe gjekk av i Regjeringskvartalet i Oslo og dagen då AUF sin sommarleir på Utøya blei omgjort til ein massakre.
77 personar mista livet sitt som følgje av terroren.
Var nære ved å mista framtida si
To av jentene som var på Utøya, Rebekka Hennum og Frida Ripland Moberg, fortel i NRK-dokumentaren om korleis dei opplevde skytinga, og om korleis dei ser føre seg framtida.
– Eg har eit fantastisk liv og ei framtid framføre meg som eg må nyta. Eg skal bli gamal og eg skal veksa opp. Eg er så glad at eg får sjansen til dette, for eg var nære ved å mista det, seier Ripland Moberg.
Veninna hennar som ho flykta saman med blei skoten, men begge overlevde ved å gøyma seg i hytta der Norsk Folkehjelp haldt til.
– Eg har blitt litt som ein annan person. Eg er mykje modigare enn eg var før. Eg tenker at når eg har klart dette så kan eg klara alt, seier Rebekka Hennum som saman med veninna sumde til ein båt som berga dei.
– Han er feig
Om mannen som seier han står bak ugjerningane, Anders Behring Breivik, har ikkje jentene stort anna å seia enn at han var feig:
– At han i det heile tatt kom til Utøya der det er omlag 700 ungdommar som på mange måtar er heilt forsvarslause er feigt. Eg har ikkje eit anna ord for det, seier Hennum.
– Han er ikkje ein helt, han er ikkje ein krigar, han er ein mann i eit kostyme. Han er ikkje meir enn det. Han er feig, seier Ripland Moberg.
- Les òg:
I dokumentaren som NRK har laga treff du også andre som overlevde terroren, og du blir kjend med nokre av dei som ikkje overlevde.
Du får også sjå eit Norge som sørgjer, men som blir styrka med samhald og kjærleik i tida etter terroren råka landet.