Terrorekspert og direktør ved Institutt for fredsforsking (PRIO), Kristian Berg Harpviken, er overraska over at det truleg er ein norsk høgreekstremist som står bak gårsdagens terrorhandlingar som tok minst 91 menneskeliv.
– Ja, det er overraskande. Som så mange andre, mistenkte også eg at dette var internasjonal islamistisk terrorisme. Det er det dei fleste kommentatorar og tryggingsstyresmakter fokuserer på når det gjeld terror no, seier Harpviken.
– Internasjonal islamisme har også lagt hovudgrunnlaget for PST sine trugselvurderingar dei siste åra, legg PRIO-direktøren til.
Minst 91 drepne
Nordmannen Anders Behring Breivik (32) vart pågripen fredag kveld, og er sikta for både eksplosjonen i Regjeringskvartalet og den påfølgjande terroraksjonen på Utøya i Buskerud.
Minst 84 menneske vart drepne då den sikta skaut vilt rundt seg, kledd . I tillegg er sju menneske døde etter bombeeksplosjonen i Regjeringskvartalet i Oslo sentrum.
- OVERSIKT: Alt om terroråtaket mot Noreg
Gårsdagens massakre er truleg det verste åtaket i verda utført av ein person åleine, ifølgje NTB.
Terroråtaket er også det dødelegaste i Vest-Europa sidan tog-bombingane i Madrid i 2004, då 191 menneske vart drepne og over 1800 såra.
– Mange med ekstreme, fiendtlege haldningar
Terrorekspert Helge Lurås er rådgjevar i Norsk Utanrikspolitisk Institutt (NUPI).
Han ser det også som oppsiktsvekkjande at ein norsk høgreekstremist er sikta for dei mest grufulle terroraksjonane som har råka Noreg sidan den andre verdskrigen.
– Dei organiserte, nynazistiske miljøa som blomstra her til lands på 1970- og -80-talet, er svekte. Men det finst jo likevel mange einskilde personar som er radikaliserte og har ekstreme, fiendtlege handlingar overfor innvandrarar og politikarar.
– Den sikta er ein nordmann som har kjørt radikalt ut det som har vore ein mainstream-haldning i det norske samfunnet lenge, blant anna grunna 11.september åtaket i USA og auka innvandring til Noreg.
- LES OGSÅ: Siktet skal tilhøre høyreekstremt miljø
– Me er sjølv skuldige
- Politiet i Noreg held dei islamistiske miljøa i Noreg under tett oppsyn. Har dei like god kontroll med høgreekstremistiske miljø?
– Det trur eg nok. Det har vore eit hovudfokus for PST i lang tid. Det er lettare for norske styresmakter å overvaka norske ekstremistiske miljø enn å komma inn under huda på islamistiske miljø.
Ifølgje Lurås vil konsekvensane av terroråtaket bli langt mindre og annleis no som det ikkje ser ut til å ha ei kopling til islamisme.
– Det internasjonale presset på Noreg vil bli langt mindre. Me er sjølv skuldige, på eit vis. Det blir vanskelegare for politiske grupper i Noreg å spela på innvandringsfrykt. Gårsdagens hending viser kva utslag det kan få å blåsa opp denne frykten.
- LES OGSÅ: Ber om videomateriale fra publikum