- Det blir ein kamp mot klokka

– Me arbeider no iherdig med å få UNE til å erkjenna at denne saka fortener å verta handsama på ny. Om dei ikkje gjer det, må me gå til søksmål, opplyser advokaten til papirlause Maria Amelie, Brynjulf Risnes.

Risnes seier han har fått tindrande klare opplysningar frå Politiets Utlendingseining (PU) om at det det vil ta minimum ti dagar frå ho vart varetekstfengsla og fram til utsending.

– Det er heilt utelukka at styresmaktene vil deportera Amelie i hui og hast. Det ville vore ei uheldig løysing for alle partar, seier han.

Må informera Russland

Amelie har budd ulovleg i Noreg sidan ho og familien fekk avslag på søknaden om asyl i 2002. Tysdag denne veka vart ho arrestert av Politets utlendingseining (PU) i Lillehammer.

I går bestemte Oslo Tingrett at Amelie må sitja i varetekt fram til uttransporteringa til Russland.

• LES OGSÅ: Derfor kastes Maria Amelie ut

Ifølgje aktor i saka, politiadvokat Rolf Odner frå PU, må russiske styresmakter verta informerte om heimsendinga minst ti dagar i forkant.

Dermed vil uttransporteringa skje i ein gong i tidsrommet 23-27.januar.

Forsvararen til Amelie har med andre ord ni dagar på seg til å få UNE til å «ta til fornuft».

• LES OGSÅ: Maria Amelie: - Jeg er helt skjelven

– Strir med menneskerettane

– Me har ikkje gjeve opp håpet. Det skjer jo ofte at nemda må vurdera opphaldssaker på ny. I Amelie si sak er det utan tvil fleire viktige moment som UNE ikkje har teke omsyn til i det endelege avslaget.

• LES OGSÅ: UNE: Maria Amelie har ikke beskyttelsesbehov

Advokaten viser blant anna til at kvinna var eit barn då ho kom hit, at ho ikkje har noko forhold til Russland og at nemda aldri har høyrt hennar versjon av saka. Han får støtte frå Helsingforskomiteen.

– Maria Amelie blei pågripen utan å ha fått tilbod om eit intervju, og blei heller ikkje underretta om vedtaket. At ho ikkje har fått høve til å forklara saka si for norske styresmakter, meiner me er i strid med menneskerettane, seier generalsekretær i organisasjonen, Bjørn Engesland i ei pressemelding.

– Ikkje prestisjenederlag

Direktøren i UNE, Terje Sjeggestad fortalde i går at saka til Amelie ikkje var spesiell nok til å kvalifisera for utvida saksbehandling.

Sjeggestad seier også at Amelie er såpass ressurssterk at ho ikkje vil ta skade av å verta deportert til Russland.

– Ho vil greia seg fint der, seier han.

• LES OGSÅ: Én avgjorde Maria Amelies skjebne

Advokat Risnes meiner UNE snarast må bita i seg at dei har gjort ei feilvurdering.

– Nemda må ikkje sjå det som eit prestisjenederlag å snu sjølv om presset no er massivt.

• LES OGSÅ: 1000 demonstrerte for Maria Amelie i Oslo

Risnes er klar på at dei vil gå rettens veg, dersom UNE sjølv ikkje gjer heilomvending i saka.

– Men me håpar å sleppa ei omfattande rettssak, som både vil vera kostbar og unødvendig, seier han.