Nå blir det kroppsskanning ved norske flyplassar

I går fortalte Senterpartipolitikar Laila Melkevoll om ei ubehageleg oppleving ho hadde hatt på flyplassen ved Førde. Ho måtte ta av seg brysthaldaren med metallspiler, før ho skulle gjennom tryggleikskontrollen.

I dag kan partikollega til Melkevoll, samferdselsminister Marit Arnstad, fortelja at slike BH-episodar kan bli historie.

• Les òg: Måtte ta av seg bh-en på flyplassen
• Les òg: - Bh-saka burde vore handtert betre

Mindre kroppsleg kontakt

Regjeringa har nemleg snudd, og seier nå ja til kroppsskannarar ved norske flyplassar.

– Kroppsskannarane vil redusera bruk av handsøk og det vil vera eit valfritt tilbod til passasjerar, seier Arnstad.

Årsaka til at Laila Melkevoll måtte ta av seg brysthaldaren på eit toalett på lufthamna, var at det ikkje var kvinneleg tilsette som kunne kroppsvisitera ho.

– I dette konkrete tilfelle kunne ho gått gjennom kroppskannaren, og ein kunne sett at det var ein bøyel i BH-en som gav utslag. Ho måtte ikkje tatt av BH-en anten det var ei kvinne eller ein mann som stod i kontrollen, seier Morten Wathne ved Stavanger lufthamn Sola.

På denne flyplassen er dei glade for at regjeringa har opna for ny teknologi, men har framleis ikkje tatt stilling til om dei vil ha kroppsskannar eller ikkje.

– Det er ei føresetnad at den gjer tryggleikskontrollen meir effektiv, seier Wathne.

Omstridd

I 2010 sa dåverande samferdselsminister, Magnhild Meltveit Kleppa, eit klart nei til eit forsøk med kroppsskanning ved norske flyplassar.

Skanningsmetoden har vore omstridd, og den blitt kalla «nakenskanning». Ordlyden til Kleppa var den gong at det ikkje kom på tale å innføra ei slik form for kontroll ved norske flyplassar.

• Les òg: Vil ha kroppsskanner på Gardermoen
• Les òg: Skal kroppsskanne flypassasjerer til USA

Namnet «nakenskanning» kjem frå at maskinane som nyttar seg av røntgenteknologi syner tydelege kroppskonturar på ein monitor like ved maskinen (sjå faktaboks).

• Kva meiner du om bruk av kroppsskannarar ved norske flyplassar? Sei meininga di nedst i artikkelen ...

Dei nyare modellane av skannarane nyttar seg av såkalla millimeterbølgjer, og det er strenge reglar til bruken, seier Arnstad.

– Ein kan ikkje lagra, oppbevara, kopiera eller skriva ut informasjon frå skannaren. Passasjeren som blir klarert i skannaren skal vera anonym. Kroppsskannaren vil heller ikkje avsløra kroppskonturar, seier ho.

Lufthamnsoperatøren bestemmer

Arnstad understrekar også at kroppsskannarar skal vera eit valfritt tilbod for dei som reiser.

– Kroppsskannarar er ein av fleire metodar som brukast for å styrka tryggleiksnivået, men passasjerar kan reservera seg mot bruk av skannaren.

EU-kommisjonen har laga eit regelverk for kroppsskannarar i EU/EØS området, og det er dette regelverket Norge nå innfører.

Det er opp til lufthamnsoperatøren å bestemma om dei vil ha kroppsskannarar i tryggleikskontrollen.

Med dagens regelverk kan dei nytta seg av manuell gjennomsøking, metalldetektorportal, handhalden metalldetektor, bombehund og kroppsskannar.

Avinor har tidlegare vurdert skannarar som er basert på millimeterbølgjer, som gjer konturlause og kjønnsnøytrale bilete. Dei er svært positive til mindre og nyare modellar som har kome på marknaden.