Dei borgarlege partia er lei påstandar frå dei raudgrøne om at ei ikkje-soslialistisk regjering vil late seg presse av Frp til å kutte i kulturbudsjetta, og at kulturlivet vil få det vanskeleg dersom det vert regjeringsskifte.
Difor går i dag førstekandidatane i Oslo for Høgre, Venstre og Krf ut i Aftenposten og erklærer at Framstegspartiet skal stengjast ute frå all makt over kulturpolitikken dei neste fire åra.
Felles utsegn
Per-Kristian Foss (Høgre), Trine Skei Grande (Venstre) og Hans-Olav Syversen (Krf) seier i ei felles utsegn at "dei er sterkt ueinige i dei kraftige kutta i kulturbudsjetta som Frp har stått for på Stortinget, og at det er uaktuelt for dei å gå inn på ein slik politikk."
Framstegspartiet sin kulturpolitiske talsmann Ulf Erik Knudsen seier til Aftenposten at han beklagar kulturgarantien frå dei borgarlege, og at dette ikkje er eigna til å skape eit godt samarbeidsklima for eventuelle forhandlingar om regjeringsmakt.
- Frp har ikkje fleirtal
Per-Kristian Foss meiner det er viktig for dei å no markere avstand til kulturpolitikken til Framstegspartiet.
- Høgre er eit kulturparti, og vil ikkje gå inn for å rasere stønad til kunstnarar og kulturrådet, seier Per-Kristian Foss.
Foss hevdar at kulturlovnaden dei no kjem med også vil vere noko verdt, også dersom Høgre skulle kome til å gå i regjering med berre Framstegspartiet.
- Framstegspartiet har ikkje fleirtal for sine forslag i Stortinget, og regjeringa må forhalde seg til parlamentariske prinsipp, seier Foss.
Ut mot «fyrsten»
Per-Kristian Foss langar også ut mot kulturminister Trond Giske, som han kallar for «fyrsten» i norsk kulturliv.
- Høgre står for mangfald. Eit kulturliv som berre hyllar fyrsten, er ikkje teneleg. Kulturlivet må vere kritisk til makta, seier Foss.
Han meiner at norsk kulturliv i dag er for mykje er styrt av kulturdepartementet.
- Trur du denne kulturgarantien kjem til å sikre vilkåra for kulturlivet etter valet?